سجاول ۾ ايڊيشنل ڊپٽي ڪمشنر ٽو جي صدارت هيٺ اھم اجلاس ٿي گذريو

ڪڻڪ جي خريداري ۽ ذخيره اندوزي جي روڪٿام ۽ سرڪاري پاليسي تي مؤثر عملدرآمد بابت غور ويچار

سجاول (رپورٽر) ايڊيشنل ڊپٽي ڪمشنر ٽو سجاول جي صدارت هيٺ ڪڻڪ جي خريداري ۽ ذخيره اندوزي جي روڪٿام ۽ سرڪاري پاليسي تي مؤثر عملدرآمد بابت اهم اجلاس منعقد ٿي گذريو. اجلاس ۾ ضلعي جي سمورن اسسٽنٽ ڪمشنرن، ڊسٽرڪٽ فوڊ ڪنٽرولر، سمورن مختيارڪارن سميت واپارين، رائس مل مالڪن ۽ اٽي جي چڪي مالڪن جي نمائندن شرڪت ڪئي. اجلاس دوران ڪڻڪ جي خريداري بابت موجوده انتظامن، ذخيرن جي صورتحال، مارڪيٽ ۾ دستيابي، ذخيره اندوزي جي روڪٿام، روينيو انتظاميا ۽ خوراڪ کاتي وچ ۾ گڏيل رابطن ۽ حڪومتي هدايتن تي عملدرآمد جو تفصيلي جائزو ورتو ويو. ايڊيشنل ڊپٽي ڪمشنر اجلاس کي خطاب ڪندي چيو تہ عوام کي ڪڻڪ جي بنا رڪاوٽ فراهمي کي يقيني بڻائڻ ضلعي انتظاميا جي اولين ترجيح آهي. هن لاڳاپيل آفيسرن کي هدايت ڪئي تہ مصنوعي کوٽ پيدا ڪندڙن، ذخيره اندوزي ڪندڙن ۽ ناجائز منافعي خوري ۾ ملوث عناصرن خلاف قانون موجب سخت ڪارروائي ڪئي وڃي. اجلاس ۾ فيصلو ڪيو ويو تہ سڀئي اسسٽنٽ ڪمشنر پنهنجي پنهنجي حدن اندر ڪڻڪ جي منڊين، گودامن، رائس ملن ۽ اٽي جي چڪين جا باقاعده معائنا ڪندا، جڏهن تہ ڊسٽرڪٽ فوڊ ڪنٽرولر روينيو انتظاميه سان مربوط رابطو برقرار رکندي ڪڻڪ جي خريداري ۽ ذخيرن بابت باقاعده رپورٽون پيش ڪندو. وڌيڪ اهو بہ فيصلو ڪيو ويو تہ سڀئي مختيارڪار ذخيره اندوزي يا غير قانوني طور ڪڻڪ ذخيرو ڪرڻ جي واقعن جي فوري نشاندهي ۽ رپورٽنگ کي يقيني بڻائيندا. واپارين، رائس مل مالڪن ۽ اٽي جي چڪي مالڪن کي هدايت ڪئي وئي تہ هو پنهنجي اسٽاڪ جو مڪمل رڪارڊ برقرار رکن ۽ جاچ ڪندڙ ٽيمن سان مڪمل سهڪار ڪن. اجلاس ۾ اهو پڻ طئي ڪيو ويو تہ ڪڻڪ جي خريداري، معائنن ۽ کنيل قدمن بابت روزاني بنياد تي ڪارواين بابت رپورٽ ڊپٽي ڪمشنر آفيس ڏانهن اماڻي ويندي، جيئن صورتحال جي مسلسل نگراني ۽ مؤثر عملدرآمد کي يقيني بڻائي سگهجي. اجلاس جي پڄاڻي تي سڀني لاڳاپيل آفيسرن کي اجلاس جي فيصلن تي سختي سان عملدرآمد ڪرڻ جون هدايتون جاري ڪيون ويون.