گڏاپ ۾ هٿياربند ڌاڙو، گهر ڀاتين کي يرغمال بڻائي ڪروڙين روپين جو سون ۽ روڪ رقم ڦر

8هٿياربند جوابدار اڍائي ڪلاڪ گهر ۾ موجود رهيا، ٻارن سميت گهر ڀاتين تي تشدد

ملير (رپورٽ: عبدالرشيد مورجھريو) گڏاپ ۾ هٿياربند ڌاڙيلن هڪ شهري جي گهر ۾ داخل ٿي گهر ڀاتين کي يرغمال بڻائي ڪروڙين روپين جي ماليت جو سون، روڪ رقم ۽ ٻيو قيمتي سامان ڦر ڪري فرار ٿي ويا. متاثر شهري ڌرم داس ڪرپلاڻي موجب رات جو لڳ ڀڳ ٽين وڳي چارموٽرسائيڪلن تي سوار اٺ هٿياربند جوابدار گهر ۾ گهڙي آيا، جن گهر ڀاتين کي هٿيارن جي زور تي يرغمال بڻايو، مٿن تشدد ڪيو ۽ معصوم ٻارڙن تي به هٿيار تاڻي کين ٻڌي ڇڏيو هن ٻڌايو ته جوابدارن اڍائي ڪلاڪن تائين گهر جي هر ڪمري جي تلاشي ورتي ۽ صبح جو پنجين وڳي تائين واردات جاري رکي. ڌاڙيل گهر مان لڳ ڀڳ 160 کان 180 تولا سون، 16 کان 17 لک رپيا روڪ رقم ۽ ٻيو قيمتي سامان کڻي فرار ٿي ويا واقعي جي اقليتي اڳواڻ مکي اوڌا مل سخت مذمت ڪندي چيو ته اطلاع ڏيڻ باوجود حد جو ايس ايڇ او يا ڪو به اعليٰ پوليس آفيسر واقعي واري هنڌ نه پهتو، جڏهن ته پوليس طرفان رڳو چوڪي انچارج کي موڪلي رسمي ڪارروائي ڪئي وئي. هن چيو ته گڏاپ ۾ ايڏي وڏي ڌاڙي باوجود پوليس جي غيرفعال رويي سبب علائقي ۾ خوف ۽ بيچيني پکڙيل آهي. علائقي واسين مطالبو ڪيو آهي ته جوابدارن کي جلد گرفتار ڪري ڦريل مال هٿ ڪري متاثر خاندان کي انصاف فراهم ڪيو وڃي.