جهمپير ويجهو ونڊ انرجي ڪمپني جي مقامي ملازمن جو انتظاميه خلاف احتجاج

ملازمن ڪمپني جي مک گيٽ آڏو علي خان چانگ، رفيق چانگ، منور چانگ ۽ ٻين جي اڳواڻي ۾ احتجاج ڪيو

ٺٽو(ڊر) جهمپير لڳ ڪوھستاني پٽي ۾ قائم هوا مان بجلي پيدا ڪندڙ ماسٽر ونڊ انرجي ڪمپني ۾ ڪمپني انتظاميہ طرفان مقامي ملازمن سان ناانصافيون جاري، ان سلسلي ۾ متاثر مقامي ملازمن پاران کين تمام گهٽ پگهارون ملڻ توڙي سالانہ بونس سميت گهربل سهولتون نه ملڻ خلاف ملازمن پاران ڪمپني جي مک گيٽ آڏو ھڪ احتجاجي مظاھرو علي خان چانگ، رفيق چانگ، منور چانگ، علي نواز چانگ ۽ ٻين جي اڳواڻي ۾ ڪندي چيو ته اسان گذريل ڏهن سالن کان ماسٽر ونڊ انرجي ڪمپني ۾ ملازمت ڪري رهيا آھيون، پر اسان کي هن مهانگائي جي دور ۾ به صرف ساڍا 27 هزار روپيہ پگهار ڏني پئي وڃي، جيڪا تمام گهٽ آھي، جنھن مان گھر جو گذر سفر بہ ڪري نٿا سگھون. ھنن چيو ته سنڌ سرڪار پاران ملازمن جي پگهار 37 ھزار روپيہ مقرر ٿيل آھي، جنھن تي ھن ڪمپني جي انتظاميہ عمل ڪرڻ لاء تيار ناھي، ان کانسواء اسانکي سالانہ بونس کان به محروم رکيو ويو آھي. ھنن چيو ته هن ڪوھستاني علائقي ۾ 25 کان وڌيڪ ونڊ ڪمپنيون لڳل آھن، جن ۾ ڪم ڪندڙ ملازمن کي بهترين پگهارون، سالانہ بونس ۽ ٻيون مراعتون ڏنيون وينديون آھن، پر ھي واحد ماسٽر ونڊ ڪمپني آھي، جنھن ۾ ڪم ڪندڙ مقامي ملازمن سان انصافيون ڪري سڀني سھولتن کان محروم رکيو ويو آھي، جنھن جو ڪير بہ نوٽيس وٺڻ لاء تيار ناھي. هنن الزام ھڻندي چيو ته موجوده ڪمپني جي ايڊمين جو رويو بہ مقامي ملازمن سان بھتر ناھي، ھنن وس وارن کان گھر ڪئي تہ کين پگھارون وڌائي سنڌ سرڪار جي اعلان مطابق 37 ھزار روپيہ ڏيڻ سميت کين بونس سان گڏ بيون مراعتون ڏيئي ملازم آزار ايڊمين کي هٽائي ايماندار آفيسر مقرر ڪري کين پنهنجا جائز حق ڏنا وڃن، ٻئي صورت ۾ مسئلن جي حل تائين سندن پر امن احتجاج جاري رهندو.