ملير ۾ پسند جو پرڻو ڪندڙ جوڙي جو جرڳائي وڏيرن خلاف احتجاج

ملير (رپورٽ: عبدالرشيد مورجھريو) شڪار پور جي ڳوٺ ڇتو منگي جي رهواسي نصيب الله شيخ ۽ مديجي جي رهواسڻ صائمہ شيخ عوامي پريس ڪلب ملير ۾ پريس ڪانفرنس ڪندي دانهيو آهي ته هنن هلندڙ سال فيبروري ۾ حيدرآباد جي ڪورٽ ۾ پسند جي شادي ڪئي جنهن سبب سندن سڀ مٽ مائٽ جان جا دشمن بڻجي ويا ۽ کين مارڪٽ ڪري اذيتون ڏئي شهر ڇڏڻ تي مجبور ڪيو ويو، هنن ٻڌايو ته ڇهن مهينن تائين هو دربدري واري زندگي گذاريندا رهيا، نصيب الله شيخ ٻڌايو ته آگسٽ مهيني ۾ سندن برادري جي سردار محمد حسن شيخ جي سرپنئچي ۾ فيصلو ڪيو ويو جنهن ۾ اسان مٿان 15 لک رپيا سڱ چٽي جو فيصلو مڙهيو ويو، جن مان مون پنهنجي امڙ جا زيور کپائي 10 لک رپيا ادا ڪيا آهن ۽ هاڻي باقي پئسن جي لاءِ سردار ۽ اڳئين ڌر جون فونون اچي رهيون آهن، پئسا نه ڏيڻ جي صورت ۾ سنگين نتيجا ڀوڳڻ جون ڌمڪيون ڏنيون پيون وڃن، جڏهن ته مون وٽ هاڻي کائڻ لاءِ به ڪجهه ڪونهي، هنن حڪومت وقت، قانون لاڳو ڪندڙ ادارن ۽ انساني حقن جي تنظيمن کي اپيل ڪئي ته کين تحفظ فراهم ڪيو وڃي.