سجاول ۾ ڏير ۽ مڙس تي الزام لڳائيندڙ ناري جي ڏيرياڻي پاران سندس الزام رد

سجاول (رپورٽر) سجاول ۾ ڏيرن ۽ سُهري طرفان مبينا ظلمن بابت پريس ڪانفرنس ڪندڙ نياڻي لدينا جي الزامن کي سندس ڦڦي جي پٽ مرحوم شاھد رند جي ڀاء عرفان رند جي زال افشان رد ڪندي چيو آهي ته انهن الزامن ۾ ڪا به صداقت ناهي. آئون پڻ ساڳئي گهر ۾ رهندڙ آهيان ، ھن پنھنجي مڙس عرفان رند ۽ سھري غلام حسين رند سان گڏ سورج سجاولي پريس ڪلب ۾ پريس ڪانفرنس ڪندي چيو ته لدينا پنهنجي مڙس شاھد رند جي وفات بعد جيڪي الزام هنيا آهن، اهي مڪمل طور تي بي بنياد ۽ ذاتي مفادن تي ٻڌل آهن.هن دعويٰ ڪئي ته، "لدينا جي وار ڪٽجڻ جو سبب طبي هو، کيس مٿي ۾ ملي جي بيماري هئي، جنهن سبب هوءَ وقت بوقت پاڻ وار ڪٽرائيندي هئي، ان تي ڪنهن به قسم جو تشدد نه ٿيو آهي."افشان موجب، لدينا جي پيءُ محمد بخش سهتو هن سموري ڊرامي جو مرڪزي ڪردار آهي، جيڪو صرف مرحوم شاھد رند جي ملڪيت تي قبضو ڪرڻ چاهي ٿو. هن وڌيڪ چيو ته لدينا پاران ڏنل بيانن سان خاندان جي عزت کي سخت نقصان رسيو آهي.افشان وس وارن کان مطالبو ڪيو ته معاملي جي مڪمل ۽ شفاف جاچ ڪرائي وڃي ته جيئن حقيقتون سامهون اچي سگهن ۽ ڪو به بيگناهه شخص بدنامي يا قانوني ڏکيائن جو شڪار نه ٿئي.جڏھن ته افشان ۽ الزام ھڻندڙ لدينا جي سھري جو چوڻ آھي ته لدينا جو پيء رٽائرڊ پوليس جمعدار آھي جيڪو منھنجي ننھن کي ورغلائي اسان جي خلاف بيان ڏياري پلاٽن جي قبضي ڪرڻ جي سازش پيو ڪري ـ ھن وڌيڪ الزام ھڻندي چيو ته ڪجھ ڏينھن پھرين پڻ محمد بخش سھتو ۽ چنيسر رند ۽ ھڪ نامعلوم منھنجي گھر تي حملو ڪري مونکي زخمي ڪيو آھي پوليس اڃان تائين ڪيس داخل ڪرڻ لاء تيار ناھي ھنن وس وارن کي اپيل ڪئي آھي ته اسان سان انصاف ڪيو وڃي