سجاول جي بي آءِ ايس پي وظيفو جاري نه ٿيڻ خلاف عورتن جو ڌرڻو

مستحق عورتن لٺيون ۽ ڪهاڙيون کڻي ٺٽو روڊ بلاڪ ڪري ڇڏيو

سجاول (رپورٽر) سجاول ۾ بينظير انڪم سپورٽ پروگرام جي وظيفي جا پئيسه جاري نه ٿيڻ خلاف مستحق عورتن پاران روڊ بلاڪ ڪري احتجاجي ڌرڻو هنيو ويو، عورتن لٺيون ۽ ڪهاڙيون ھٿن ۾ کڻي سجاول لڳ برانڇ موري وٽ ٺٽو سجاول روڊ جي ٻنهي پاسن کان رڪاوٽون رکي ٽائرن کي باهيون ڏئي روڊ بلاڪ ڪري ڇڏيو جنهن سبب روڊ جي ٻنھي پاسن سوين گاڏين جو قطارون لڳي ويون. مستحق عورتن جو چوڻ هو ته سنڌ جي ٻين ضلعن ۾ بينظيرانڪم سپورٽ جا پئسا جاري ڪيا ويا آهن سجاول ضلعي کي اڃاتائين پئيسه جاري نه ڪيا ويا آھن. اسان غريب مسڪين پنهنجا ڀاڙا خرچ ڪري روز شهر اچون ٿا آفسير رڳو سکڻا دلاسا ڏئي موٽايو ڇڏين. عورتن اعليٰ اختيارين ۽ ڊي سي سجاول کي اپيل ڪندي چيو ته مستحق عورتن جي وظيفي جي ٽن مهينن جي قسط جي رقم جلد کان جلد جاري ڪئي وڃي. جيستائين اسان جو مطالبو نه مڃيو ويندو تيستائين ڌرڻو جاري رهندو. ڌرڻو هڪ ڪلاڪ جاري رهڻ بعد اي ڊي سي ون ۽ ٽو ڌرڻي وٽ پهچي عورتن کي سان ڳاله ٻوله ڪري ٽن ڏينهن ۾ پئيسه جاري ڪرڻ جو يقين ڏياريو جنهن بعد عورتن ڌرڻو ختم ڪيو.