عمرڪوٽ ۾ پراڻي دشمني تان عدالت مان واپسي دوران پيرسن قتل

عمرڪوٽ (رپورٽ:ڪانجي مل رکيسر) عمرڪوٽ ۾ مبينه پراڻي دشمني جي نتيجي ۾ 60 ورهين جي پيرسن قادر بخش منڱريو کي هٿياربندن وھرو روڊ تي فائرنگ ڪري قتل ڪري ڇڏيو، پوليس موجب نامعلوم موٽرسائيڪل سوار هٿياربندن رڪشي تي سڌي فائرنگ ڪئي، جنهن جي نتيجي ۾ قادر بخش منڱريو سخت زخمي ٿي پيو، وارثن کيس فوري طور سول اسپتال عمرڪوٽ منتقل ڪيو، جتي ڊاڪٽرن سندس فوت ٿيڻ جي تصديق ڪئي، واقعي کانپوءِ جوابدار فرار ٿيڻ ۾ ڪامياب ٿي ويا، مقتول جي پٽ سرور منڱريو صحافين سان ڳالهائيندي الزام هنيو ته سندس والد تي هي ٻيون ڀيرو قاتلاڻو حملو ڪيو ويو آهي، هن دعويٰ ڪئي ته اڳ به عدالت مان واپسي دوران ڊي سي هائوس ڀرسان سندن مٿان حملو ٿيو هو، جنهن ۾ سندس والد بچي ويو هو، هن چيو ته هن ڀيري بہ ڪورٽ مان تاريخ تان واپسي اچي رھيا ھئاسين تہ ٽي موٽرسائيڪلن تي سوار ڇهن ڄڻن، جن ۾ سونو راڄڙ، حاجي ۽ ڌنيو سميت ٻيا شامل هئا، سندن والد تي سڌي فائرنگ ڪري کيس قتل ڪيو، هن مطالبو ڪيو ته نامزد جوابدارن خلاف ڪيس داخل ڪري کين فوري گرفتار ڪري انصاف فراهم ڪيو وڃي، ٻئي پاسي ايس ايچ او سٽي نور محمد نوحاڻي ٻڌايو ته اطلاع ملندي ئي پوليس واقعي واري هنڌ پهچي شواهد گڏ ڪري جاچ شروع ڪري ڇڏي آهي، هن چيو ته لاش جو پوسٽ مارٽم ڪرائڻ کانپوءِ وارثن حوالي ڪيو ويو آهي، جڏهن ته تدفين بعد وارثن جي فرياد تي ڪيس داخل ڪري قانوني ڪارروائي ڪئي ويندي، سندس چوڻ هو ته واقعي جي مختلف رخن کان جاچ جاري آهي ۽ جوابدارن جي گرفتاري لاءِ ڇاپا هنيا پيا وڃن، هوڏانهن مقتول جو مڙهه گهر پهچڻ تي گهر ۾ ڪهرام مچي ويو.