ٺٽو: لاسي برادري جو نوجوان تي فائرنگ ڪندڙ جوابدارن جي گرفتاري لاءِ مڪلي ويجهو باءِ پاس تي ڌرڻو، ٽريفڪ معطل

گذريل ڏينهن آمري اسٽاپ وٽ هٿياربندن جي فائرنگ ۾ شڪيل لاسي زخمي ٿي پيو: وارث

ٺٽو(شفيق ڀٽي) گذريل رات ٺٽي شھر جي امري اسٽاپ تي ٿيل جهيڙي دوران سخت زخمي ٿيل سوزوڪي ڊرائيور شڪيل لاسي جي حالت ڳڻتي جوڳي هجڻ ۽ واقعي ۾ ملوث جوابدارن جي گرفتاري نه ٿيڻ خلاف زخمي ٿيل سوزوڪي ڊرائيور جي ڪيترن ئي وارثن توڙي شھرين پاران ٺٽو باءِ پاس تي ھڪ احتجاجي مظاھرو اياز لاسي، ظفر لاسي، خالق لاسي، وڏيرو حنيف لاسي ۽ ٻين جي اڳواڻي ۾ ڪري روڊ تي ڌرڻو ھڻي روڊ بند ڪري ڇڏيو، جنهن سبب ٽريفڪ معطل ٿي ويئي، ان موقعي تي احتجاج ڪندڙن لاسي برادري جي ماڻهن پوليس جي مبينا بي حسي خلاف احتجاج ڪندي الزام هنيو آهي ته سندن هڪ نوجوان شڪيل لاسي تي بروھي برادري جي ڪُجھ نوجوانن حملو ڪري کيس سخت تشدد جو نشانو بڻايو ويو، جنهن سبب هو زخمي ٿي ڳڻتي جوڳي حالت ۾ ڪراچي جي اسپتال ۾ علاج هيٺ آهي. احتجاج ڪندڙن جو چوڻ هو ته پوليس نہ ڪيس داخل ٿي ڪري ۽ نه ئي جوابدارن جي گرفتار ڪرڻ لاءِ ڪا ڪارروائي ٿي ڪري، هنن مطالبو ڪيو ته متاثر زخمي نوجوان سان انصاف ڪري واقعي ۾ ملوث شريف بروھي ۽ ٻين سمورن جوابدارن خلاف قانون موجب فوري ايف آءِ آر داخل ڪري کين گرفتار ڪري زخمي شڪيل لاسي کي انصاف فراهم ڪيو وڃي.