عمرڪوٽ ۾ پيئڻ جي پاڻي جي منصوبن جو افتتاح

ڳوٺاڻي بنيادي ڍانچي جي واڌاري لاءِ هڪ اهم تقريب منعقد

عمرڪوٽ(ڪانجي مل رکيسر) ٻڏڻ کان بچاءَ جي عالمي ڏينهن جي مناسبت سان ضلعي عمرڪوٽ جي يونين ڪائونسل خان صاحب عطا محمد پلي ۾ آفتن جي خطري ۾ گهٽتائي (DRR)، پاڻي جي تحفظ بابت آگاهي ۽ موسمياتي تبديليءَ سان هم آهنگ ڳوٺاڻي بنيادي ڍانچي جي واڌاري لاءِ هڪ اهم تقريب منعقد ڪئي وئي. ان موقعي تي ضلعي ڪائونسل عمرڪوٽ جي وائيس چيئرمين ميان پير محمد ولهاري، ڳوٺ عيسى مڱريو ۽ گهموري ۾ قائم ڪيل ٻه ڪميونٽي فزيڪل انفراسٽرڪچر (CPI) تحت پيئڻ جي پاڻي جي فراهمي وارن منصوبن (DWSS) جو باضابطه افتتاح ڪيو.اهي منصوبا اويئر پاران "سماجي خدمتن جي بحالي ۽ موسمياتي لچڪ" (RSS&CR) منصوبي تحت پاڪستان پاورٽي ايلويئيشن فنڊ (PPAF) جي مالي سهڪار سان مڪمل ڪيا ويا آهن. موسمياتي خطرن کي نظر ۾ رکندي تيار ڪيل انهن منصوبن ۾ محفوظ سطحِي پاڻي جا تلاءَ ۽ ماحول دوست بايو سينڊ فلٽريشن سسٽم شامل آهن، جيڪي ٻوڏ کان متاثر ٿيندڙ ڳوٺاڻن کي صاف ۽ محفوظ پيئڻ جو پاڻي فراهم ڪندا.تقريب کي خطاب ڪندي ميان پير محمد ولهاري چيو ته محفوظ پاڻي جي فراهمي وارو بنيادي ڍانچو نه رڳو انساني ضرورت آهي، پر ٻڏڻ جهڙن حادثن جي روڪٿام ۽ برادرين جي آفتن کي منهن ڏيڻ واري صلاحيت کي مضبوط ڪرڻ ۾ پڻ اهم ڪردار ادا ڪري ٿو.ٻڏڻ کان بچاءَ جو عالمي ڏينهن اسان کي ياد ڏياري ٿو ته غير محفوظ ۽ کليل پاڻي جا ذريعا، خاص طور تي ٻارن لاءِ، وڏو خطرو آهن. انهن خطرناڪ هنڌن کي محفوظ، باڙ لڳل ۽ منظم پيئڻ جي پاڻي جي تلائن ۾ تبديل ڪرڻ سان نه صرف صاف پاڻي جي فراهمي ممڪن ٿي رهي آهي، پر ٻڏڻ جي خطرن ۾ به نمايان گهٽتائي اچي رهي آهي ۽ ڳوٺاڻيون برادريون وڌيڪ محفوظ بڻجي رهيون آهن." راجب علي سميجو، آر ايس ايس اينڊ سي آر پروجيڪٽ مئنيجر چيو ته انهن منصوبن جي رٿابندي پاڻي جي دستيابي سان گڏ انساني جانين جي تحفظ کي به نظر ۾ رکي ڪئي وئي آهي.اسان جو مقصد صاف پاڻي جي فراهمي سان گڏ ماڻهن جي حفاظت کي يقيني بڻائڻ آهي. انهن تلائن جي چوڌاري حفاظتي بند، باڙ ۽ محفوظ پاڻي ڪڍڻ جا هنڌ ٺاهيا ويا آهن ته جيئن خاص طور تي برساتن ۽ ٻوڏ جي موسم دوران حادثاتي طور پاڻي ۾ ڪرڻ جا امڪان گهٽجي وڃن. ساڳئي وقت، بايو سينڊ فلٽريشن سسٽم واريءَ ۽ بجري جي قدرتي تهن ذريعي پاڻي کي صاف ڪري ٿو، جنهن لاءِ نه بجلي جي ضرورت پوي ٿي ۽ نه ئي ڪيميائي دوائن جي، تنهنڪري اهو هنگامي حالتن ۾ به انتهائي ڪارائتو ثابت ٿئي ٿو،برادري جي نمائندي حاجي حسين مڱريو اويئر ۽ پاڪستان پاورٽي ايلويئيشن فنڊ (PPAF) جا ٿورا مڃيندي چيو ته هن منصوبي سان علائقي ۾ نه رڳو صاف پاڻي جي سهولت فراهم ٿي آهي، پر عوام جي حفاظت پڻ يقيني بڻجي آهي. "ڪيترن ئي سالن کان عورتون ۽ ٻار غير محفوظ تلائن ۽ ڦسلندڙ واهن جي ڪنارن تان پاڻي ڀرڻ دوران خطري کي منهن ڏيندا هئا. هاڻي اهي محفوظ تلاءَ ۽ بايو سينڊ فلٽريشن سسٽم اسان جي گهرن تائين صاف پيئڻ جو پاڻي پهچائي رهيا آهن، جڏهن ته والدين کي پنهنجي ٻارن جي حفاظت بابت به وڏو اطمينان حاصل ٿيو آهي."تقريب جي پڄاڻي پاڻي جي تحفظ بابت عملي مظاهرن، ٻڏڻ کان بچاءَ بابت آگاهي سيشنن ۽ مقامي اڳواڻن ۽ وليج آرگنائيزيشنز (VOs) جي گڏيل عزم سان ٿي، جنهن تحت هنن نون قائم ڪيل منصوبن جي بهتر سنڀال، باقاعده سار سنڀال ۽ ڊگهي مدي واري پائيداري کي يقيني بڻائڻ جو واعدو ڪيو.