ڪالاباغ ڊيم، سنڌو درياھ تي ڌاڙي، دھشتگردي ۽ ڪرپشن خلاف جدوجھد ۾ سنڌياڻي تحريڪ اڳواڻي وارو ڪردار ادا ڪيو: اياز لطيف پليجو

حيدرآباد (بيورو) قومي عوامي تحريڪ جي سربراھ اياز لطيف پليجي عورتن جي عالمي ڏينهن 8 تي پيغام ڏيندي چيو تہ ڪالاباغ ڊيم، سنڌو درياھ تي ڌاڙي، دھشتگردي ۽ ڪرپشن خلاف جدوجھد ۾ سنڌياڻي تحريڪ اڳواڻي وارو ڪردار ادا ڪيو آھي. سياست سان گڏ زندگي جي ھر شعبي ۾ جيستائين عورتن جو ڪردار شامل نہ ھوندو ڪاميابيون ممڪن ناھن. مھذب سماجن ۾ عورتن کي برابري واري حق حاصل آھن. اياز لطيف پليجي چيو تہ مسئلن ۽ مصيبتن کي عورت سڀني کان وڌيڪ ڀوڳي ٿي، پوء اھو مسئلو غربت جو ھجي، مھانگائي جو ھجي، ڪرپشن، بيروزگاري، تعليم جي تباھي، صحت جي سھولتن جي اڻ ھوند يا اڻ برابري ۽ جھالت جو ھجي. تعليم سڀني مسئلن جو حل آھي۔ عورت ۽ ٻارن کي عزت ۽ حيثيت، برابري واري حق سان اڳتي وڌيا آھن. اياز لطيف پليجي چيو تہ عورتن جي آزادي ۽ انھن کي تعليم ۽ بنيادي حق ڏيڻ جا مخالف مدي خارج ۽ فرسوده سوچ رکندڙ آھن۔ اھي ذھني طور اڄ بہ پٿر جي دور ۾ رھن ٿا. سنڌ ۾ عورت انتھائي ظلم ۽ جبر جو شڪار آھي۔ حڪومت نياڻين جي تعليم لاء ڪجھ ناھي ڪيو۔ روزانو نياڻيون اغوا ڪيون وڃن ٿيون، قتل ۽ تشدد جا واقعا ٿين ٿا۔ پر ذميوارن کي بہ ڪا بہ سزا نٿي ملي. اياز لطيف پليجي چيو تہ سنڌ سميت پاڪستان ۾ ڪٿي بہ عورت محفوظ ناھي۔ سنڌ ۾ عورتن سان انتھائي بدتر حالت آھي۔ نياڻيون زبردستي اغوا ڪري مذھب مٽائي شاديون ڪرايون وڃن ٿيون۔ تشدد روز جو معمول بنيل آھي سنڌ ۾ گئس ۽ بجلي جي لوڊشيڊنگ، تعليم ۽ صحت جي تباھي، بيروزگاري ۽ معاشي تباھي جي تڪليفن کي سڀ کان وڌيڪ عورتون ڀوڳين ٿيون۔