نوشهروفيروز ۾ ٻارن جي عالمي ڏينهن جي حوالي سان آگاهي ريلي ڪڍي وئي

عوام ۾ شعور اجاگر ڪري پنهنجي مستقبل جي معمارن جي بهتر تعليم ۽ تربيت لاءِ شعور پيدا ڪرڻو پوندو: لياقت علي لنڊ

نوشهرو فيروز (ڊر)ضلعي انتظاميا نوشهروفيروز ۽ سوشل ويلفيئر کاتي پاران ايڊيشنل ڊپٽي ڪمشنر لياقت علي لنڊ جي اڳواڻي ۾ ٻارن جي عالمي ڏينهن جي حوالي سان ڊپٽي ڪمشنر آفيس کان هڪ آگاهي ريلي ڪڍي وئي. ريلي ۾ ڊپٽي ڊائريڪٽر سوشل ويلفيئر اينڊ چائلڊ پروٽيڪشن آفيسر ارباب علي اڄڻ، پرنسپال گورنمينٽ ڊگري ڪاليج نوشهروفيروز محمد افضل ميمڻ، ڊپٽي ڊائريڪٽر انفارميشن غلام عباس ڳوراهو ۽ ٻين کاتن جي آفيسرن، سماجي تنظيمن جي نمائندن سميت مختلف اسڪولن جي استادن ۽ شاگردن شرڪت ڪئي. ريلي ۾ شريڪ ماڻهن جي هٿن ۾ پلي ڪارڊ ۽ بينر هئا جن تي ٻارن جي حقن ۽ تعليم جي تحفظ بابت نعرا لکيل هئا. ريلي ۾ شرڪت ڪندڙن ۽ ميڊيا جي نمائندن سان ڳالهائيندي ايڊيشنل ڊپٽي ڪمشنر لياقت علي لنڊ چيو ته ٻارن جي عالمي ڏهاڙي جي موقعي تي اسان کي گهرجي ته عوام ۾ شعور اجاگر ڪري پنهنجي مستقبل جي معمارن جي بهتر تعليم ۽ تربيت جي لاءِ شعور پيدا ڪيون ته جيئن اهڙو ماحول پيدا ڪري سگهجي، جتي ٻارن کي محفوظ بڻائي سگهجي. هر ٻار محفوظ، معزز ۽ بااختيار ھجي سنڌ حڪومت پاران ٻارن جي حقن جي تحفظ کي يقيني بڻائڻ لاءِ چائلڊ پروٽيڪشن يونٽ پڻ قائم ڪيا ويا آهن، ان موقعي تي ڊپٽي ڊائريڪٽر سوشل ويلفيئر اينڊ چائلڊ پروٽيڪشن آفيسر نوشهروفيروز ارباب علي اڄڻ چيو ته هن ڏينهن کي ملهائڻ جو مقصد ٻارن جي تحفظ جو عزم آهي اسان سڀني کي پنهنجي ۽ علائقي جي سڀني ٻارن جي حقن ۽ ڀلائي لاءِ ڪم ڪرڻ جي ضرورت آهي.