سنڌ جي ماڻهن کي سنڌ بچائڻ لاءِ متحد ۽ منظم ٿي جدوجهد ڪرڻ جي ضرورت آهي: پليجو

قومي عوامي تحريڪ پاران سنڌ جي ٻرندڙ مسئلن جي حل لاءِ 8 آڪٽوبر تي جلسي جون تياريون جاري

حيدرآباد (بيورو) قومي عوامي تحريڪ پاران مھانگائي، ڪرپشن ،سنڌ جي زمينن تي قبضن، سنڌو درياءَ تي ڌاڙي ،زرعي تباھي،ڪوڙي آدمشماري ،ڌاڙيل راڄ ،نياڻي ۽ صحافين جي قتل، ميرٽ جي تباھي، وسيلن جي نيلامي ۽ ٻين سنڌ دشمن منصوبن خلاف 8 آڪٽوبر تي حيدرآباد جي باء پاس وٽ سنڌ بچايو ملڪ بچايو جلسي عام کي ڪامياب بڻائڻ لاءِ قومي عوامي تحريڪ جي مرڪزي جنرل سيڪريٽري مظھر راھوجو ۽ سنڌياڻي تحريڪ جي مرڪزي صدر زينت سمون جي اڳواڻي ۾ حيدرآباد جي آس پاس وارن علائقن جا دورا ڪري دعوت ڏنيون، قومي عوامي تحريڪ جي مرڪزي ترجمان اشرف پليجو رفيق ڪنراڻي حيدرآباد جي صحافين، سول سوسائٽي جي اڳواڻن کي دعوتون ڏنيون. سڄي سنڌ ۾ پنج لک کان مٿي ھينڊ بل ورھايا ويا آهن، قاسم آباد ۽ ڀرپاسي وارن علائقن ۾ جھنڊن ۽ وال پوسٽرن سان سينگاري ويو آهي جلسي لاءِ مختلف ڪميٽيون جوڙيون ويون آهن. جلسي جون تياريون مڪمل ڪيون ويون آهن. قومي عوامي تحريڪ جي سربراھ اياز لطيف پليجي چيو تہ اقتدار حاصل ڪرڻ جي هن جنگ ۾ سنڌ جي حقن ۽ اختيارن جو سودو ڪرڻ جي ڪنهن کي بہ اجازت نہ ڏينداسين. سنڌ جي ماڻهن کي هڪ دفعو ٻيهر سنڌ بچائڻ لاءِ متحد ۽ منظم ٿي جدوجهد ڪرڻ جي ضرورت آهي پيپلز پارٽي اقتدار لاء سنڌ جي وحدت کي داءُ تي لڳائي ڇڏيو آھي، پيپلز پارٽي اقتدار جي عارضي مفادن لاء سنڌ جي پٺ ۾ خنجر ھنيا، 15 سالن کان جاري پ پ پ جي گذريل حڪومتن سنڌ کي ڪنگال بنائي ڇڏيو۔سنڌ جي عوام کي سنڌ دشمن پيپلزپارٽي ۽ زرداري مافيا آڏو ايندڙ اليڪشنن ۽ جدوجھدن ۾ مضبوط ۽ جٽادار ڪردار ادا ڪرڻو پوندو. اياز لطيف پليجي چيو تہ سنڌ ۾ مھانگائي عروج تي آھي، جنھن ڪري مزدور پورھيت ۽ ھاري غربت ۽ بدحالي جو شڪار آھي ناجائز مھانگائي جي ڪري غريب عوام لٽجي رھيو آھي۔ سنڌ حڪومت عوام کان لاتعلق بنجي وئي آهي، ناجائز منافعي خور مافيا ناجائز فائدو وٺي ھر شئي جا اگھ آسمان تي پھچائي ڇڏيا آھن ڪنھن بہ شئي تي ڪنٽرول ناھي ۽ بي پناھ مھانگائي وڌي وڃي ٿي۔ مھانگائي عروج تي آھي، جنھن ڪري مزدور پورھيت ۽ ھاري غربت ۽ بدحالي جو شڪار آھي۔ سنڌ حڪومت عوام کي بک بدحالي کان سواءِ ڪجھ بہ نہ ڏنو آهي ماڻهو ھڪ وقت جي ماني کائڻ لاءِ بہ پريشان آھي. اياز لطيف پليجي چيو تہ ماڻھن کي بنيادي انساني حق تڏھن حاصل ٿي سگھن ٿا جڏھن اسان جي ملڪ جون پاليسيون تبديل ٿينديون. عالمي طاقتن جي ھدايتن تي ھلڻ بدران پنھنجون خودمختيار پاليسيون جوڙيندا. انھي پاليسي ۾ مستحڪم معيشت، تعليم، سائنس، صحت، ميرٽ ۽ ترقي ھوندي، پوءِ غربت اسان لاءِ وڏو مسئلو نہ رھندي. اسين دنيا جا خوشحال ۽ ترقي يافتح ملڪ ۽ قوم بنجي سگھون ٿا. اياز لطيف پليجي چيو تہ پاڪستان ۾ برابري وارو جمھوري نظام گھرجي۔ قدرتي وسيلن تي ڪمائي جو پھريون حق مالڪ صوبي ۽ انھن علائقن جو آھي اڪثريت جي نالي ۾ سنڌ جي تيل، گئس، ڪوئلي، زمين، پاڻي ۽ ٻين وسيلن کي مال غنيمت ڪري لٽيو پيو وڃي۔ سنڌ ۾ سڀ کان وڌيڪ بيروزگاري، سڀ کان وڌيڪ، غربت، سڀ کان وڌيڪ بدحالي، سڀ کان وڌيڪ ڪرپشن سڀ کان وڌيڪ ڏوھ، لاقانونيت، ناانصافي ۽ حڪمرانن جي بي حسي آھي.