وارھہ: عوامي تحريڪ جي سينئر اڳواڻ ۽ نامياري ليکڪ ڪامريڊ منان چانڊيو جي ٻئي ورسي جو جلسو

229 views | 01st Oct 2023 • سنڌي خبرون

لال جروار سميت وڏي انگ ۾ اڳواڻن جي شرڪت، لفظن جون ڀرپور ڀيٽائون

وارھہ: عوامي تحريڪ جي سينئر اڳواڻ ۽ نامياري ليکڪ ڪامريڊ منان چانڊيو جي ٻئي ورسي جو جلسو، عوامي تحريڪ جي مرڪزي صدر لال جروار سميت وڏي انگ ۾ اڳواڻن جي شرڪت، لفظن جون ڀرپور ڀيٽائون.
خبر موجب عوامي تحريڪ جي اڳوڻي ضلعي صدر ۽ سينئر قلمڪار ڪامريڊ منان چانڊيو جي ٻئي ورسي وارھ ۾ پرجوش نموني ملهائي جلسو ڪيو ويو.
ان موقعي تي خطاب ڪندي عوامي تحريڪ جي مرڪزي صدر لال جروار چيو ته منان چانڊيو سنڌ جي قومي حقن جي جدوجهد ۾ تمام گهڻو سرگرم رهيو ۽ ڪڏھن به مايوس نه ٿيو،
سندس لازوال سياسي سفر مظلوم طبقي جي هميشه رهنمائي ڪندو رهندو. هن چيو ته سنڌ جا تاريخي، ثقافتي ماڳ ۽ مڪان حڪمرانن تباھ ڪري ڇڏيا آھن،
حمل ڍنڍ، منڇر ڍنڍ، کي تباھ بڻايو ويو آھي، سنڌ تي ڌاريا قابض بڻائي ڌرتي ڌڻين کي دربدر ڪيو ويو آھي. هن چيو ته بحريا ٽائون، ڊي ايڇ اي، ذوالفقار آباد سميت رهائشي اسڪيمن جي نالي ۾ سنڌ جي لکين ايڪڙ زمين ملڪ رياض، زرداري ۽ ٻين مافيائن پنهنجي قبضي ۾ آڻي ڇڏيون آھن
هاڻ زرعي انقلاب جي نالي ۾ 13 لک ايڪڙ زمين غير ملڪين حوالي ڪئي پئي وڃي جنهن جي خلاف ڀرپو جدوجهد جي ضرورت آھي
عوامي تحريڪ پرامن ۽ سياسي تحرڪ ذريعي سنڌ جي عوام جو تحفظ ڪندي. جلسي کي عوامي تحريڪ جي مرڪزي اڳواڻ نور ڪاتيار، سرتاج چانڊيو، ساجد مهيسر، مرڪ منان، عرفان منان، غلام مصطفيٰ کاهوڙي، عاطف ملاح، وارھ پريس ڪلب جي صدر اياز چانڊيو، سنڌي ادبي سنگت جي اڳواڻ نجيب چانڊيو، جيئي سنڌ محاذ جي مرڪزي اڳواڻ غفار ميرجت ۽ ٻين خطاب ڪندي چيو ته ڪامريڊ منان قومي ۽ طبقاتي جبر خلاف 4 بهارون عملي جدوجهد ڪئي ۽ آخري دم تائين پورهيت فڪر سان سلهاڙيل رهيو،
هن پُٺ تي پيل علائقي ۾ رهي ڪري نياڻين کي تعليم پرائي ۽ کين سياسي تحرڪ ۾ اڳڀرو ڪيو کيس هميشه ياد رکيو ويندو.
جلسي ۾ مطالبو ڪيو ويو ته صحافي جان محمد مهر جي قاتلن کي سزا ڏني وڃي ۽ سنڌ ۾ افغانين سميت سمورن ڌارين کي نيڪالي ڏني وڃي.
جلسي ۾ سياسي، سماجي اڳواڻن، شھرين سميت وڏي انگ ۾ عورتن ۽ ٻارڙن شرڪت ڪئي.
ن کان اڳ عوامي تحريڪ اڳواڻن ڪامريڊ منان جي مزار تي حاضري ڀري گلن جي چادر چاڙھي سلامي ڏني.