جسقم ملير جي ڪارڪنن جو نجي ڪمپنين مان سنڌي نوجوانن کي بي دخل ڪرڻ خلاف احتجاج

ڪيترن ئي فيڪٽرين مان سنڌي نوجوانن کي سنڌي هجڻ ڪري بيدخل ڪيو پيو وڃي: اڳواڻ

ملير: جسقم ملير جي ڪارڪنن نجي ڪمپنين مان سنڌي نوجوانن کي بي دخل ڪري کين بيروزگار ڪرڻ خلاف ملير پريس ڪلب آڏو احتجاجي مظاهرو ڪيو ۽ نجي ڪمپنين جي انتظاميه خلاف سخت نعريبازي ڪئي ان موقعي تي اڳواڻن جسقم اڳواڻ مختيار سومرو، جي ايم سيال، ياسر سيال، فرحان سنڌي ۽ ٻين صحافين کي ٻڌايو ته نجي ڪمپنيون ايم 2، سورتي ڪمپني، قاسم ٽيڪسٽائيل سميت ٻين ڪيترن ئي فيڪٽرين مان سنڌي نوجوانن کي سنڌي هجڻ ڪري بيدخل ڪيو پيو وڃي جڏهن ته جبري طور تي سنڌي نوجوانن کان زبردستي استعيفائون پڻ ورتيون وڃن ٿيون جنهن جي اسان سخت لفظن ۾ مذمت ڪيون ٿا هن چيو ته سوچيل سمجهيل سازش تحت نوجوانن کي ڪمپنين مان بيدخل ڪري کين بيروزگار ڪيو پيو وڃي ته جيئن سنڌين جي اڪثريت ڪراچي ۾ گهٽ ٿئي ۽ افغانين، بنگالين ۽ برمين کي سهولت ملي سگهي اهڙي عمل خلاف جسقم توڙي ٻيون ڪيتريون ئي قومپرست تنظيمون سراپا احتجاج بڻيل آهن پر پرڏيهين کي نيڪالي ڏيڻ بدران سنڌي ماڻهن کي بيروزگار ڪري کين وڌيڪ دٻائڻ جي ڪوشش ڪئي پئي وڃي هنن موجوده نگران حڪومت کان مطالبو ڪيو ته نجي ڪمپنين کي ليبر قانون موجب پابند ڪيو وڃي ته هو بنا ڪنهن رنگ و نسل جي فرق جي سنڌي نوجوانن کي بيدخل ڪرڻ جو سلسلو بند ڪيو وڃي ۽ غيرقانوني طور ترسيل پرڏيهين کي ڏيهه نيڪالي ڏني وڃي.