ملير: قاسم ٽيڪسٽائل ڪمپني ٻاهران ٻن گروپن ۾ جهيڙو، 3ڄڻا زخمي

شاهه لطيف ٽائون پوليس صورتحال تي ضابطو آڻي جاچ شروع ڪري ڇڏي

ملير (رپورٽ: عبدالرشيد مورجھريو) شاهه لطيف ٽائون ٿاڻي جي حدن اندر قائم قاسم ٽيڪسٽائل ڪمپني ٻاهران ٻن ٺيڪيدارن، رضا ۽ عادل آرائين جي ملازمن وچ ۾ سوشل ميڊيا تي هلندڙ مهم جي تڪرار پرتشدد جهيڙي جي صورت اختيار ڪري ورتي. شروعاتي اطلاعن موجب ٻنهي ڌرين وچ ۾ پهرين سخت جملن جي ڏي وٺ ٿي، جيڪا ڏسندي ئي ڏسندي هٿا پائي ۽ جهيڙي ۾ تبديل ٿي وئي عيني شاهدن موجب جهيڙي دوران ٻنهي گروپن جا ماڻهو ڪمپني ٻاهران نڪري آيا ۽ هڪ ٻئي تي ڏنڊن ۽ پٿرن سان حملو ڪيو، جنهن سبب علائقي ۾ خوف ۽ هراس پکڙجي ويو. جهيڙي جي نتيجي ۾ ٽي ڄڻا زخمي ٿي پيا، جن کي فوري طور جناح پوسٽ گريجوئيٽ ميڊيڪل سينٽر منتقل ڪيو ويو زخمين ۾ 30 ورهين جو اصغر کوسو، 25 ورهين جو راشد کوسو ۽ 20 ورهين جو جنيد ڪوري شامل آهن، جن کي اسپتال ۾ طبي امداد فراهم ڪئي پئي وڃي واقعي جي اطلاع ملندي ئي شاهه لطيف ٽائون پوليس جي نفري فوري طور موقعي تي پهچي صورتحال تي ضابطو آندو. پوليس علائقي ۾ امن امان بحال ڪندي وڌيڪ ڪنهن به اڻ وڻندڙ واقعي کان بچڻ لاءِ نگراني وڌائي ڇڏي آهي پوليس اختيارين موجب واقعي جي مختلف رخن کان جاچ جاري آهي ۽ جهيڙي ۾ ملوث ماڻهن خلاف قانون موجب ڪارروائي ڪئي ويندي. شروعاتي جاچ موجب جهيڙي جو ڪارڻ سوشل ميڊيا تي هلندڙ مهم مان پيدا ٿيل تڪرار ٻڌايو پيو وڃي، جڏهن ته پوليس شاهدن جي بيانن ۽ ثبوتن جي روشني ۾ حقيقتن جو تعين ڪري رهي آهي. پوليس جو چوڻ آهي ته علائقي ۾ صورتحال مڪمل طور ڪنٽرول ۾ آهي ۽ شهرين کي پريشان ٿيڻ جي ڪا ضرورت ناهي. واقعي بابت وڌيڪ قانوني ڪارروائي ۽ جاچ جاري آهي.