ڪراچي جي ديهه الهه ٻنو جا 31 قديم ڳوٺ اوندهه ۾ ٻڏل

ٽن ڳوٺن کي مليل بجلي به 10ڏينهن کان بند، پاڻي جي شديد کوٽ

ملير (رپورٽ: عبدالرشيد مورجھريو) ڪراچي اولھ جي سامونڊي پٽي واري تاريخي علائقي ديه اله ٻنو جا 31 قديم ڳوٺ اڄ به ترقي کان محروم آهن، جتي 28 ڳوٺ ملڪ جي 78 سالن جي تاريخ باوجود اڃان تائين بجلي جهڙي بنيادي سهولت کان وانجهيل آهن، جڏهن ته صرف ٽن ڳوٺن عبدالله ڀنڊ، حاجي نور محمد ڀنڊ ۽ اله بخش ڀنڊ کي حب بلوچستان مان بجلي فراهم ڪئي وئي هئي، پر اها به گذريل ڏهن ڏينهن کان مڪمل طور بند پيل آهي، جنهن سبب سڄي علائقي ۾ سخت پريشاني پکڙجي وئي آهي۔ ڳوٺاڻن جي وفد مقبول ڀنڊ، حاجي صادق ڀنڊ، امتياز ڀنڊ، عبدالرحيم ڀنڊ ۽ ٻين عوامي پريس ڪلب ملير جي صحافين سان ڳالهائيندي دانهن ڪئي ته ديه الهٻنو جا رهواسي صدين کان سمنڊ ڪناري آباد آهن ۽ مڇي ماري توڙي ڏهاڙي مزدوري ڪري پنهنجن ٻچن جو پيٽ پالين ٿا، پر افسوس جو اڄ تائين حڪومت طرفان کين ڪا به بنيادي سهولت فراهم نه ڪئي وئي آهي۔ هنن چيو ته بجلي بند هجڻ سبب پاڻي جي سخت کوٽ پيدا ٿي وئي آهي، عورتون، ٻار ۽ بزرگ سخت گرمي ۾ عذاب جهڙي زندگي گذارڻ تي مجبور آهن، جڏهن ته روزگار به سخت متاثر ٿي رهيو آهي۔ ڳوٺاڻن جو چوڻ هو ته ملڪ کي قائم ٿئي لڳ ڀڳ هڪ صدي ٿيڻ واري آهي، پر سندن علائقو اڄ به بجلي، گيس، صاف پاڻي، صحت ۽ روڊن سميت سمورين بنيادي سهولتن کان محروم آهي۔ متاثر ڳوٺاڻن حڪومت، چونڊيل نمائندن ۽ لاڳاپيل ادارن کان فوري نوٽيس وٺي بند پيل بجلي بحال ڪرڻ ۽ ديه الهٻنو جي سمورن 31 ڳوٺن کي بنيادي سهولتون فراهم ڪرڻ جو مطالبو ڪيو آهي، ٻي صورت ۾ احتجاجي تحريڪ هلائڻ جي ڌمڪي پڻ ڏني آهي...