ريڙهي مياڻ لڳ کڏي ڪريڪ ۾ تيز هوا سبب ٻيڙي اونڌي، 18 مهاڻا ٻڏي ويا

مقامي مهاڻن پهچي پنهنجي مدد پاڻ تحت مهاڻن کي بچائي ورتو

ملير (رپورٽ: عبدالرشيد مورجھريو) ريڙهي ڳوٺ جي موساڻي پاڙي سان تعلق رکندڙ ماڻهن سان ڀريل پمو شيخ جي ٻيڙي مڇي جو شڪار ڪندي کڏي ڪريڪ وٽ رات دير سان تيز هوائن لڳڻ سبب اونڌي ٿي پئي۔ حادثي وقت ٻيڙي ۾ 18 مهاڻا سوار هئا، جن مان 15 مهاڻن کي پنهنجي مدد پاڻ بچايو ويو جڏهن ته 5 ڄڻا ڪجهه وقت لاءِ لاپتا ٿي ويا جن جي ڳولا مقامي ماڻهن رات دير تائين جاري رکي۔مقامي ذريعن موجب حادثو رات لڳ ڀڳ 11 وڳي پيش آيو، جڏهن اوچتو موسم خراب ٿي وئي ۽ تيز هوا سبب ٻيڙي ڪنٽرول کان ٻاهر ٿي وئي۔ علائقي واسين ٻڌايو ته سرڪاري ادارن طرفان ڪنهن به قسم جي فوري امداد نه پهتي، جنهن سبب مقامي ماڻهن پنهنجي مدد پاڻ هيٺ بچاءُ واريون ڪارروايون ڪيون مهاڻن جي گهر پهچڻ تي وارثن مٺايون ورهايون جڏهن ٻڏل ٻيڙي جو ڪو پتو نه پئجي سگهيو ٻئي پاسي مقامي ماڻهن جو چوڻ آهي ته ريڙهي مياڻ واري واقعي ۾ ڪوبه جاني نقصان ناهي ٿيو، جڏهن ته سڀئي ماڻهو محفوظ ٿي ويا آهن، پر حادثي دوران ٻيڙي مڪمل طور تي غرق ٿي وئي، جيڪا پمو شيخ جي ملڪيت هئي ۽ سندن روزگار جو اهم ذريعو پڻ هئي۔متاثر ٻيڙي مالڪ پمو شيخ افسوس جو اظهار ڪندي چيو ته هو باقاعده ٽيڪس ادا ڪن ٿا، پر علائقي ۾ بنيادي سهولتن جي کوٽ آهي۔ هن چيو ته هنگامي حالتن ۾ نه ايمبولينس موجود آهي ۽ نه ئي ريسڪيو بوٽ، جنهن سبب ماڻهن کي سخت مشڪلاتن کي منهن ڏيڻو پوي ٿو۔مقامي ماڻهن حڪومت کان مطالبو ڪيو آهي ته سامونڊي ۽ ڪريڪ وارن علائقن ۾ ايمرجنسي سهولتون فراهم ڪيون وڃن، جيئن مستقبل ۾ اهڙن واقعن دوران جاني ۽ مالي نقصان کان بچي سگهجي۔