ملير ۾ مبينا کنڀي گم ڪيل پورهيت اصغر مستوئي جي آزادي لاءِ احتجاجي مارچ

رزاق آباد ڌڻي پرتو ڳوٺ کان عوامي پريس ڪلب ملير تائين احتجاجي مارچ ڪيو ويو

ملير (رپورٽ: عبدالرشيد مورجھريو)رزاق آباد جي ڌڻي پرتو ڳوٺ مان مبينا طور سي آءِ اي پوليس اهلڪارن هٿان گرفتار ٿيڻ بعد لاپتا ٿيل پورهيت اصغر مستوئي جي بازيابي لاءِ وڏي انگ ۾ شهرين ڌڻي پرتو ڳوٺ کان عوامي پريس ڪلب ملير تائين احتجاجي مارچ ڪيو ۽ سخت نعريبازي ڪندي اصغر مستوئي جي فوري بازيابي ۽ آزادي جو مطالبو ڪيو احتجاجي ريلي جي اڳواڻي شهزادو مستوئي، محمد رحيم مستوئي، چاڪر خان شر، عامر جتوئي، اڪبر کونهارو، وڪيل جبار سهتو ۽ وڪيل بخت علي لاشاري ڪئي. مظاهرو ڪندڙن جي هٿن ۾ بينر ۽ پلي ڪارڊ هئا، جن تي "اصغر مستوئي کي آزاد ڪيو" سميت انصاف جي حق ۾ نعرا لکيل هئا ان موقعي تي سينيئر صحافي شهزادو مستوئي چيو ته اصغر مستوئي سندس ڀاڻيجو ۽ هڪ غريب پورهيت آهي، جنهن کي بنا ڪنهن قانوني جواز جي گهر مان گرفتار ڪيو ويو آهي ۽ مبينا طور وڏي رشوت طلب ڪئي پئي وڃي. ٻين اڳواڻن الزام هنيو ته پوليس ۽ ان جي مخبرن جي انتقامي ۽ ڪوڙي نشاندهي سبب سندن زندگي عذاب بڻجي وئي آهي مقررن چيو ته جيڪڏهن اصغر مستوئي ڪنهن قانوني ڪاروائي تحت پوليس جي تحويل ۾ آهي ته کيس فوري طور عدالت ۾ پيش ڪيو وڃي، سندس وارثن کي سندس خيريت بابت آگاهه ڪيو وڃي ۽ قانوني گهرجون پوريون ڪيون وڃن. جيڪڏهن مبينا گرفتاري بابت خبرون درست آهن ته لاڳاپيل اختيارين کي فوري جاچ ڪري حقيقتون عوام آڏو آڻڻ گهرجن.مظاهرو ڪندڙن اعليٰ اختيارين کان مطالبو ڪيو ته اصغر مستوئي کي بنا دير بازياب ڪرايو وڃي، سندس وارثن جي بيچيني ختم ڪئي وڃي ۽ جيڪڏهن ڪنهن اهلڪار اختيارن کان تجاوز ڪيو آهي ته ان خلاف قانون موجب سخت ۽ بنا امتياز ڪارروائي ڪئي وڃي. هنن چيو ته "انصاف ۾ دير، انصاف کان انڪار جي برابر آهي" ۽ رياست جي ذميواري آهي ته هر شهري جي آئيني ۽ قانوني حقن جو تحفظ يقيني بڻائي.