جھرڪ اسپتال اندر پيراميڊيڪل اسٽاف جي احتجاجي ڪئمپ، ايم ايس جي بدلي جو مطالبو

جيئي سنڌ محاذ ضلعي ٺٽي جي صدر امجد شورو پڻ پنهنجن ساٿين سميت احتجاج ۾ شرڪت ڪري يڪجهتي جو اظهار ڪيو

ٺٽو (رپورٽ شفيق ڀٽي)جھرڪ رورل هيلٿ سينٽر ۾ پيراميڊيڪل اسٽاف يونٽ پاران اسپتال جي بائونڊري وال اندر احتجاجي ڪئمپ قائم ڪري ميڊيڪل سپرنٽنڊنٽ (ايم ايس) جھرڪ خلاف سخت احتجاج ڪيو ويو ۽ سندس فوري بدلي جو مطالبو ڪيو ويو۔ احتجاج ۾ پيراميڊيڪل عملي وڏي انگ ۾ شرڪت ڪئي۔مظاهري جي اڳواڻي زاهد حسين جھرڪائي، غلام مصطفيٰ شاهه، عبدالحئي سومرو، محمد الياس سومرو ۽ ٻين ڪئي۔ ان موقعي تي جيئي سنڌ محاذ ضلعي ٺٽي جي صدر امجد شورو پڻ پنهنجن ساٿين سميت احتجاج ۾ شرڪت ڪري يڪجهتي جو اظهار ڪيو۔مظاهرين جو چوڻ هو ته ايم ايس جي انتظامي روين ۽ مبينا ناروا سلوڪ سبب عملي کي سخت ذهني دٻاءُ ۽ پيشه ورانه ڏکيائين کي منهن ڏيڻو پئجي رهيو آهي، جنهن جا سڌا اثر اسپتال جي ڪارڪردگي ۽ مريضن کي ميسر سهولتن تي پئجي رهيا آهن۔ هنن اختيارين کان فوري نوٽيس وٺي ڪارروائي ڪرڻ جو مطالبو ڪيو۔جيئي سنڌ محاذ جي ضلعي صدر امجد شورو سنگين الزام هڻندي چيو ته موجوده ايم ايس جي اچڻ کانپوءِ اسپتال ۾ مريض بنيادي سهولتن کان محروم آهن۔ هن مطالبو ڪيو ته ايم ايس کي فوري طور هٽايو وڃي ۽ جھرڪ رورل هيلٿ سينٽر کي ايمبولينس سروس، دوائن جي فراهمي، صاف پاڻي ۽ بلڊ ليبارٽري سميت ضروري سهولتون مهيا ڪيون وڃن۔