عمرڪوٽ ۾ ايڊيشنل ڊپٽي ڪمشنر ون جاويد احمد ڏاھري جي صدارت هيٺ اجلاس

عمرڪوٽ (رپورٽ:ڪانجي مل رکيسر) ايڊيشنل ڊپٽي ڪمشنر ون عمرڪوٽ جاويد احمد ڏاھري جي صدارت هيٺ رمضان المبارڪ دوران مهانگائي تي ضابطو آڻڻ ۽ عوام کي رليف فراهم ڪرڻ لاءِ پرائس ڪنٽرول بابت اهم اجلاس ڊپٽي ڪمشنر آفيس جي دربار ھال ۾ منعقد ٿيو. اجلاس ۾ اسسٽنٽ ڪمشنرز ، مختيارڪار، پرائس ڪنٽرول مجسٽريٽس، فوڊ انسپيڪٽرز، مارڪيٽ ڪميٽي عملدارن، اطلاعات کاتي سميت ٻين لاڳاپيل کاتن جي آفيسرن شرڪت ڪئي۔ اجلاس دوران ايڊيشنل ڊپٽي ڪمشنر ون کي رمضان المبارڪ لاءِ تيار ڪيل پرائس لسٽن، مارڪيٽن جي مانيٽرنگ، ۽ ذخيره اندوزي خلاف ڪارروائيون ڪرڻ بابت تفصيلي بريفنگ ڏني وئي۔ ان موقعي تي اي ڊي سي ون ھدايتون ڏيندي چيو ته روزاني بنيادن تي سبزيون، ميوا، گوشت، ڪڻڪ جو اٽو، چانور، کنڊ، گيهه ۽ ٻين اشيا جي اگهن جي نگراني ڪئي وڃي ۽ سرڪاري ريٽ لسٽس تي سختي سان عمل ڪرائڻ لاءِ ٽيمون جوڙي ڇڏيون آهن۔ ان موقعي تي ايڊيشنل ڊپٽي ڪمشنر ون جاويد احمد ڏاھري چيو ته رمضان المبارڪ ۾ ناجائز منافع خوري، ذخيره اندوزي ۽ سرڪاري اگهن کان وڌيڪ اگهه وٺڻ ڪنهن به صورت ۾ برداشت نه ڪيو ويندو۔ هن چيو ته پرائس ڪنٽرول مجسٽريٽس روزانو مارڪيٽن جو دورو ڪري ريٽ لسٽن تي عملدرآمد کي يقيني بڻائن ۽ خلاف ورزي ڪندڙ دوڪاندارن خلاف جرمانا، چالان ۽ قانوني ڪارروائي ڪئي وڃي۔ ھن وڌيڪ چيو ته هر تعلقي ۾ خاص ڪنٽرول روم قائم ڪيا وڃن ته جيئن عوام پنهنجون شڪايتون درج ڪرائي سگهي۔ شڪايتن تي فوري ڪارروائي ڪري عوام کي رليف فراهم ڪيو وڃي۔ ايڊيشنل ڊپٽي ڪمشنر ون اهو پڻ هدايت ڪئي ته يوٽيلٽي اسٽورز ۽ سستي بازارن تي به ضروري شيون مناسب اگهن تي وافر مقدار ۾ موجود هجن ته جيئن عام ماڻهو کي آساني ملي سگهي۔ اجلاس ۾ اهو به فيصلو ڪيو ويو ته رمضان دوران روزاني ڪارڪردگي رپورٽ تيار ڪري ضلعي انتظاميا کي پيش ڪئي ويندي، جڏهن ته مارڪيٽن ۾ صفائي سٿرائي ۽ ٽريفڪ جي رواني کي به يقيني بڻايو وڃي۔ ان موقعي تي روز مره جي شين جا نوان ريٽ مقرر ڪيا ويا جنھن ۾ دال 200، اٽو 120 في ڪلو، کنڊ 140، چانور 325، بيسڻ 400، ڌاڻا 450، مرچ 550، ڳڙ 170، گوشت ٻڪر 1900 في ڪلو، وڏو گوشت 1050 روپيا في ڪلو ۽ ٻين شين جا اگھ پڻ مقرر ڪيا ويا۔ آخر ۾ ايڊيشنل ڊپٽي ڪمشنر ون چيو ته ضلعي انتظاميا جو مقصد عوام کي وڌ کان وڌ رليف فراهم ڪرڻ آهي ۽ ان سلسلي ۾ ڪنهن به قسم جي ڪوتاهي برداشت نه ڪئي ويندي۔