علاقائی سلامتی سمیت باہمی دلچسپی کے امور بارے تبادلہ خیال کیا
منامہ:وفاقی وزیرداخلہ و انسداد منشیات محسن نقوی نے بحرین کے ہم منصب جنرل شیخ راشد بن عبداللہ آل خلیفہ سے ملاقات کی جس دوران دوطرفہ تعلقات، علاقائی سلامتی اور باہمی دلچسپی کے امور بارے تفصیلی تبادلہ خیال کیا ۔ ترجمان وزارت داخلہ کے مطابق دونوں وزرائے داخلہ نے انسداد منشیات کے شعبے میں قریبی تعاون، قانون نافذ کرنے والے اداروں کی استعداد کار بڑھانے اور معلومات کے تبادلے کو مزید مؤثر بنانے پر اتفاق کیا۔
وزیرداخلہ محسن نقوی نے بحرینی ہم منصب کی گرمجوش میزبانی پر دلی شکریہ ادا کیا اور پاکستان کے ساتھ سکیورٹی و استحکام کے شعبوں میں تعاون بڑھانے کے عزم کو سراہا۔ محسن نقوی نے کہا کہ پاکستان اور بحرین کے درمیان برادرانہ تعلقات باہمی اعتماد اور احترام کی مضبوط بنیادوں پر قائم ہیں، دونوں ممالک کے اداروں کے درمیان قریبی رابطہ خطے میں امن و سلامتی کے لیے ناگزیر ہے۔
ملاقات میں دونوں ممالک کے عوام کے باہمی مفاد اور محفوظ مستقبل کے لیے شراکت داری مزید مستحکم بنانے کے عزم کا اعادہ کیا گیا۔
0 تبصرے