عمرڪوٽ وھرو شريف ويندڙ روڊ جي خراب حالت خلاف ڳوٺاڻن ۽ رڪشا ڊرائيورن جو ڌرڻو

روڊ تي اڇلايل واري ۽ وڏن کڏن سبب آمد و رفت ناممڪن بڻجي وئي آهي، نوٽيس ورتو وڃي: مظاهرين

عمرڪوٽ (رپورٽ:ڪانجي مل رکيسر) عمرڪوٽ کان وھرو شريف ويندڙ مک روڊ جي خراب حالت ۽ ٻن مهينن کان مرمتي ڪم بند پيل هجڻ خلاف ڳوٺاڻن ۽ رڪشا ڊرائيورن صبر جو پيالو ڇلڪي پاتو، روڊ جي مک چوڪ تي رڪشا بيهاري چار ڪلاڪن تائين ڌرڻو هنيو ويو، سخت نعريبازي ڪئي ويئي، ۽ ٽريفڪ مڪمل طور معطل ٿي وئي، ڳوٺاڻن جو چوڻ هو ته روڊ تي اڇلايل واري ۽ وڏن کڏن سبب آمد و رفت ناممڪن بڻجي وئي آهي، اسڪول ويندڙ ٻار ۽ مريض وڏي مشڪلات ۾ مبتلا آهن، پر انتظاميه مٽيءَ ڪري صفائي ڪر يا روڊ وقت سر ٺهرائي ڏيڻ لاءِ تيار ناهي، احتجاج ڪندڙن مير حسن ڪنڀر، سرفراز، ریاض، رامچند، نوراللہ، نويد، پنھون، ۽ ٻين دانھيندي چيو ته هر روز مٽي ۽ کڏن ۾ ڦاٿل گاڏيون ڏسي دل ڏکي ٿي وڃي ٿي، پر ڪو پڇڻ وارو ناهي، احتجاج ۾ سماجي اڳواڻ فقير شيوا ڪڇي، نرمل ميگھواڙ ۽ ٻين پڻ شرڪت ڪري مظاهرين سان يڪجهتيءَ جو اظهار ڪيو، مظاهرين جو مطالبو هو ته روڊ تان واريءَ فوري طور صاف ڪري مرمتي ڪم ٻيهر شروع ڪيو وڃي، ٻي صورت ۾ احتجاج جو سلسلو وڌايو ويندو، آخرڪار، پ پ ضلعي عمرڪوٽ جي سينيئر نائب صدر برھان الدين ڪنڀر احتجاجي هنڌ پهچي مظاهرين سان ڳالهه ٻولهه ڪئي ۽ جلد روڊ جو ڪم بحال ڪرائڻ جي يقين دهاني ڪرائي، جنهن بعد ڌرڻو ختم ڪيو ويو، ان موقعي تي برھان الدين ڪنڀر چيو ته ٺيڪيدار ۽ انجنيئر سان ڳالهيون ٿي چڪيون آهن، روڊ جو ڪم جلد شروع ٿيندو، ۽ جيڪڏهن ڪم ۾ دير ڪئي وئي ته آئون پاڻ به مظاهرين سان گڏ ڌرڻي ۾ شامل ٿيندس ۽ لاپرواهي ڪندڙن خلاف ڪاروائيءَ جو به اعلان ڪيو.