وزير ۽ ڪامورا عوام جي ٽئڪس سان ھلن ٿا پر پاڻ کي بادشاھ سمجھن ٿا: اياز لطيف پليجو

سنڌ جو صحت کاتو ڪرپشن جي ڪينسر ۾ ورتل آھي سرڪاري اسپتالن جي حالت خراب آھي معياري علاج جون سھولتون ناھن

حيدرآباد (بيورو) قومي عوامي تحريڪ جي سربراھ اياز لطيف پليجي چيو تہ پيپلزپارٽي جي ڪرپث حڪمرانن 18 سالن کان مسلسل سنڌ ۾ حڪمراني ڪري سنڌ کي تباھ ڪري ڇڏيو آھي سنڌ جي ماڻھن کي ھاڻ ھنن مان جان ڇڏائڻي پوندي.سنڌ جو وڏو مسئلو خراب حڪمراني ۽ اقرباپروري آھي. وزير ۽ ڪامورا عوام جي ٽئڪس سان ھلن ٿا، اھي پاڻ کي بادشاھ سمجھڻ ڇڏي ڏين. سڀ کان وڌيڪ طاقتور ڪرسي ناھي عوام کي وڏي طاقت آھي عوام کي لتاڙڻ ۽ نظرانداز ڪرڻ بند ڪيو وڃي. اياز لطيف پليجي چيو تہ سنڌ حڪومت سنڌ جي ٻيڙي ٻوڙي ڇڏي آهي. تعليم، صحت، روزگار، زراعت، صنعت، آئي ٽي ٽيڪنالاجي، خوشحالي ڏيڻ بدران سنڌ ماڻھن کي پينو فقيرن جو لشڪر بنائڻ چاھي ٿي.اياز لطيف پليجي چيو تہ سنڌ جو صحت کاتو ڪرپشن جي ڪينسر ۾ ورتل آھي سرڪاري اسپتالن جي حالت خراب آھي معياري علاج جون سھولتون ناھن. ڊاڪٽر ڊيوٽيون نٿا ڪن ڊي ايچ اوز ۽ ميڊيڪل آفيسر مٿي تائين ملي ڀڳت ڪري ڪروڙين روپيا ھڙپ ڪري وڃن ٿا. جيڪي دوائون خريد ڪيون وڃن ٿيون اھي غير معياري آھن. اڪثر اسپتالن ۾ دوائن جو کوٽ آھي. اياز لطيف پليجي چيو تہ ڪراچي، حيدرآباد سميت سنڌ جي وڏن شھرن جي اسپتالن ۾ دوائن، خوراڪ، صفائي، تيل ۽ ٻين منصوبن جي نالي ڪروڙين روپين جي ڪرپشن ٿي رھي آھي. ماڻھو سرڪاري اسپتالن بدران پرائيويٽ اسپتالن جو رخ ڪن ٿا. خانگي ڊاڪٽرن کي ڏيکارين ٿا ۽ مھانگيون دوائون خريد ڪرڻ تي مجبور آھن. اياز لطيف پليجي چيو تہ ڊاڪٽرن ۽ دوائن جي کوٽ سميت معياري ٽيسٽون نہ ٿيڻ ۽ سھولتن جي کوٽ جون شڪايتون جتان ڪٿان اچن ٿيون. اياز لطيف پليجي چيو تہ سند حڪومت غريب ماڻھن، ھارين ۽ پورھيتن لاءِ زندگي جا رستا بند ڪري ڇڏيا آھن. جن وٽ پئسا ناھن، انھن کي علاج جون سھولتون ناھن. آھي بيمارين ۾ تڙپي تڙپي مري وڃن ٿا. سنڌ ۾ غريب مسڪين ماڻھو غربت، بيروزگاري ۽ مھانگائي جي ڪري انتھا ڪسمپرسيءَ جي حالت جو شڪار آھن. اياز لطيف پليجي چيو تہ نوڪريون تہ وڪامن ٿيون پر سرڪاري ڊاڪٽرن سميت ھر کاتي جي آفيسرن جون مقرريون بہ لکين روپين جي رشوت تحت ٿين ٿيون. جيڪو ڊاڪٽر، جيڪو آفيسر پئسا ڏئي پوسٽنگ ڪرائي ٿو اھو پنھنجي ڊيوٽي مال ڪمائڻ لاءِ ڪري ٿو. عوام کي لٽي ٿو. ھر جائز ڪم لاءِ پئسا ڪمائي ٿو.