سنڌ جي ٻين شهرن جيان ور شهر ۾ به سنڌ ايمپلائيز جي سڏ تي مظاهرا

سنڌ حڪومت جي پاليسين سبب سرڪاري ملازمن جو معاشي قتلام ڪيو پيو وڃي: اڳواڻ

ٺٽو(ڊ ر)سنڌ ايمپلائيز الائنس جي سڏ تي سموري سنڌ جيان گھوڙاٻاري تعلقي جي مرڪزي شهر ور ۾ به سرڪاري ملازمن پاران احتجاجي مظاهرو ڪيو ويو. رورل هيلٿ سينٽر ور ۾ ڊاڪٽر ساجد شيخ جي اڳواڻي ۾ پيراميڊيڪل اسٽاف، ڊاڪٽرن ۽ ٻين ملازمن اسپتال جي مک دروازي آڏو گڏ ٿي سخت نعريبازي ڪئي احتجاج ڪندڙن جو چوڻ هو ته سنڌ حڪومت ملازم دشمن پاليسيون اختيار ڪيون آهن، جن سان نه رڳو سرڪاري ملازمن جي روزگار ۽ معاشي صورتحال متاثر ٿي رهي آهي، پر کين معاشي قتل ڏانهن ڌڪيو پيو وڃي هنن مطالبو ڪيو ته وفاق طرفان ملندڙ ڊسپرٽي رڊڪشن الائونس فوري طور ملازمن کي ڏنو وڃي ۽ پينشن رولز ۾ ڪيل ترميم واپس ورتي وڃي، ٻي صورت ۾ احتجاج جو سلسلو جاري رهندو ڊاڪٽر ساجد شيخ صحافين سان ڳالهائيندي چيو ته موجوده احتجاج 27 تاريخ تائين جاري رهندو، جيڪڏهن جائز مطالبا تسليم نه ٿيا ته تحريڪ وڌيڪ تيز ڪئي ويندي هن وڌيڪ چيو ته حڪومت جي ضد ۽ ملازم دشمن فيصلا نه صرف ملازمن لاءِ نقصانڪار آهن پر انهن جو سڌو اثر عوام تي به پئجي رهيو آهي احتجاج سبب رورل هيلٿ سينٽر ور ۾ او پي ڊي مڪمل طور بند رهي، جڏهن ته مليريا سيڪشن، ڊينٽل ڊپارٽمينٽ، ٽي بي وارڊ ۽ ٻيا اهم شعبا به بند رهيا نتيجي ۾ پري پري کان علاج لاءِ آيل سوين مريض شديد پريشاني ۾ مبتلا ٿي ويا ۽ بغير علاج جي واپس وڃڻ تي مجبور ٿيا. مريضن جو چوڻ هو ته حڪومت ۽ احتجاج ڪندڙن وچ ۾ تڪرار جو نقصان غريب عوام کي ڀوڳڻو پيو پوي ملازمن اعلان ڪيو ته جيستائين سندن جائز مطالبا تسليم ناهن ڪيا ويا تيستائين احتجاج جاري رھندو.