سنڌ جو ڏاهو ناميارو سگهڙ منظور سومرو دل جي تڪليف سبب بستري ڀيڙو

لوڪ ادب کي سموري حياتي ارپيندڙ منظور سومرو علاج نه ٿيڻ سبب انتهائي پريشان

ملير (رپورٽ: عبدالرشيد مورجھريو) سنڌ جو ڏاهو ڏات ڌڻي ناميارو سگهڙ منظور سومرو دل جو دورو پوڻ سبب بستري ڀيڙو، لوڪ ادب کي سموري حياتي ارپيندڙ علاج نه ٿيڻ سبب انتهائي پريشان، منظور سومرو انتهائي ڪسمپرسي جي زندگي گذارڻ تي مجبور، ريڊيو ٽي وي سميت سنڌ جي واهڻ وستين ۾ لوڪ ادب جا ڏيئا روشن ڪندڙ سگهڙ جو ترت علاج ڪرائي سندس حياتي بچائي وڃي، سگهڙن جو احتجاج، تفصيل موجب سگهڙن جي نمائندہ تنظیم سنڌ سڀيتا سگهڙ فورم باني جمشيد زهراڻي، مرڪزي صدر احمد علي چانڊيو، علي نواز لنجواڻي ۽ ٻين احتجاج ڪندي چيو آهي ته ثقافت کاتي استاد سگهڙن کي بلڪل ئي وساري ڇڏيو آهي، لوڪ ادب جي لاتين کي محفوظ ڪندڙ سگهڙن جي محنت، سندن فن ۽ زندگي تي تحقيق جي اشد ضرورت آهي جنھن ۾ ثقافت کاتي جي ڪا به هن وقت تائين دلچسپي نه رهي آهي، پر افسوس جهڙي ڳالهه هيءَ آهي ته هڙان وڙان خرچ ڪري لوڪ ادب لاءِ پاڻ پتوڙيندڙ استاد سگهڙن جو علاج ڪرائڻ لاءِ به ثقافت کاتو غير سنجيده آهي، جمشيد زهراڻي جو چوڻ هو ته منظور سومرو سموري حياتي بنا ڪنهن ساهي جي لاڳيتو لوڪ ادب لاءِ خدمتون سرانجام ڏنيون آهن، هن لوڪ ادب ۽ سنڌي ثقافت کي زندهه رکڻ لاءِ هڙان وڙان خرچ ڪري هزارين ڪچهريون ڪوٺايون ۽ سنڌ جي مختلف علائقن ۾ ٿيندڙ ڪچهرين ۾ بهرو ورتو، احمد علي چانڊيو، علي نواز لنجواڻي چيو ته سنڌ جي سگهڙن سان تعصب وارو رويو انتهائي هاڃيڪار آهي اگر لوڪ ادب جي خدمت ڪندڙ سگهڙن، محققن، ليکڪن جي سهائتا نه ٿي ته ڪو به ڏات ڌڻي هن ميدان ۾ لهي چڙهي ڪم ڪرڻ کان قاصر رهندو ۽ لوڪ ادب ميسارجي ويندو، نج قومي ادب لوڪ ادب ئي آهي ڇو ته سگهڙ پنهنجي ٻولي کي ساهه سان سانڍيندي، پراڻن محاورن، لوڪ قصن، رهڻي ڪهڻي ۽ لفظن جي ذخيري کي اصل اچار سميت محفوظ ڪريو اچن، سنڌ جي ڏات ڌڻين حڪومت سنڌ ۽ ثقافت کاتي کي اپيل ڪئي ته منظور سومرو جو علاج سرڪاري خرچ تي ڪرائي سندس حياتي بچائي وڃي.