لاڙڪاڻي ۾ تنيا ۽ جتوئي ڌرين ۾ ٿيل جهيڙي جو نبيرو

3ڏينهن اڳ اسد الله آباد محلي ۾ ٿيل جهيڙي بعد جتوئي ڌر ميڙ وٺي مير عدنان تنيو جي اوطاق تي پهتي

لاڙڪاڻو (بيورو) لاڙڪاڻي جي پير شير روڊ تي واقع اسد آباد محلي ۾ ٽي ڏينھن اڳ تنيا ۽ جتوئي برادري جي ٻن ڌرين وچ ٿيل جهيڙي جو نبيرو ٿي ويو، جتوئي برادري پاران ميڙ کڻي اچڻ کانپوءِ ڌريون کير کنڊ ٿي ويون. لاڙڪاڻي جي پير شير روڊ تي واقع اسد آباد محلي ۾ ٽي ڏينھن اڳ مير عدنان تنيي عرف فوجيءَ جي گهر جي تعمير دوران، جتوئي ۽ تنيا برادري جي ماڻهن وچ ۾ جهيڙو ٿي پيو جنھن دوران ٻنھي برادرين جا ڪجهہ ماڻهو ۽ تنيا برادري جي گهر جو ڪم ڪندڙ ڪاريگر ۽ مزدور پڻ زخمي ٿي پيا هئا. اهڙي واقعي کانپوءِ ٻنھي ڌرين ۾ ڇڪتاڻ واري صورتحال وڏي وئي هئي، جنھن بعد پوليس ٻنھي ڌرين جي معزز، وڏن مير عدنان تنيي ۽ تشڪيل جتوئي جي وڏي فرزند ايڊوڪيٽ سرتاج جتوئي جي وچ ۾ ڳالهيون ڪري معاملي کي حل ڪرايو. اهڙي صورتحال کانپوءِ جتوئي برادريء جي ماڻهن جهيڙي ۾ پنهنجي غلطي تسليم ڪئي ۽ مير عدنان تنيي جي اوطاق تي ميڙ وٺي آيا. ان موقعي تي مير عدنان تنيي عرف فوجي پنھنجي برادري جي معزز شخصيتن تنيا ويلفيئر ايسوسيئيشن لاڙڪاڻي ضلعي جي سيڪريٽري ۽ صحافي مشتاق تنيي، صابر تنيي، بلاول تنيي، بادشاھ تنيي، قادر بخش جتوئي ۽ ٻين دوستن جي سامهون جتوئي برادري جي ميڙ کي مان ڏيندي معاملي کي ختم ڪري ڇڏيو. ان موقعي تي ٻنھي ڌرين هڪ ٻئي کي معاف ڪري، ڀاڪر پائي خير جي دعا گهري ۽ پاڙي ۾ ڀائرن جيان رهڻ جو وچن ڪيو.