ملير: شاهه لطيف ٽائون ۾ پوليس مقابلو، هڪ مبينا ڏوهاري مارجي ويو، ساٿي فرار

ملير (رپورٽ: عبدالرشيد مورجھريو) شاهه لطيف ٽائون ٿاڻي جي حد سيڪٽر 20، الحمرا اسڪول ڀرسان پوليس ۽ مبينا ڏوهارين وچ ۾ ٿيل فائرنگ جي ڏي وٺ دوران هڪ مبينا ڏوهاري مارجي ويو جڏهن ته سندس ساٿي فرار ٿيڻ ۾ ڪامياب ٿي ويو پوليس موجب گشت تي مقرر اهلڪارن شڪي ماڻهن کي روڪڻ جي ڪوشش ڪئي، جنهن تي هنن گرفتاري جي خوف کان پوليس پارٽي تي فائرنگ ڪري ڏني پوليس جي جوابي فائرنگ ۾ هڪ مبينا ڏوهاري مارجي ويو، جڏهن ته ٻيو جوابدار موقعي تان فرار ٿي ويو، جنهن جي ڳولا جاري آهي پوليس جو چوڻ آهي ته مارجي ويل مبينا ڏوهاري جي سڃاڻپ نديم ولد قادر بخش، عمر لڳ ڀڳ 25 سال، طور ٿي آهي. سندس قبضي مان ڦريل موبائل فون ۽ هٿيار هٿ آيو آهي پوليس موجب مارجي ويل مبينا جوابدار عادي ڏوهاري هو ۽ اڳ به جيل وڃي چڪو هو. شروعاتي جاچ موجب هو هڪ اهڙي ٽولي سان لاڳاپيل هو، جيڪا ضلعي ملير ۾ اسٽريٽ ڪرائيم جي ڪيترين ئي وارداتن ۾ ملوث رهي آهي مارجي ويل مبينا ڏوهاري جو لاش قانوني ڪارروائي لاءِ جناح اسپتال منتقل ڪيو ويو آهي ملير پوليس موجب فرار ٿيل جوابدار جي گرفتاري لاءِ مختلف هنڌن تي ڇاپا هنيا پيا وڃن. پوليس جو وڌيڪ چوڻ آهي ته تازي ڪارروائي کانپوءِ ضلعي ملير ۾ پوليس مقابلن دوران مارجي ويل مبينا ڏوهارين جو انگ ٻن تائين پهچي ويو آهي، جڏهن ته واقعي بابت وڌيڪ جاچ جاري آهي.