ضلعي ڪائونسل ٺٽي جي اجلاس ۾ ڪئنالن خلاف ٺهراءَ پاس

ٺٽو ( شفيق ڀٽي)ضلعي ڪائونسل ٺٽي جو اجلاس ضلعي چيئرمين عبدالحميد پنهور جي صدارت هيٺ شهيد محترمه بينظير ڀٽو هال ۾ ٿي گذريو. جنهن ۾ پاڻي جي کوٽ جي مسئلن تي تفصيلي غور ويچار ڪيو ويو ۽ سنڌ جي هارين ۽ عوام جي مسئلن کي اجاگر ڪيو ويو. اجلاس دوران ميمبرن چيو ته 1999ع کان وٺي سنڌ کي پنهنجي حصي کان 40 سيڪڙو گهٽ پاڻي ملي رهيو آهي، جنهن جي تصديق ارسا ۽ آءِ ايم ايف جي رپورٽن ۾ به ٿي چڪي آهي. هن وقت ٺٽي، بدين ۽ سجاول ضلعن جي 5 لک ايڪڙ زمين سمنڊ ۾ ٻڏي وئي آهي. انڊس ڊيلٽا ۾ پاڻي جي کوٽ سبب سمنڊ روزانو 95 ايڪڙ زمين ڳڙڪائي رهيو آهي، جنهن ڪري ساحلي پٽي تي رهندڙ ماڻهو ۽ چوپايو مال سخت ڏکيائين جو شڪار آهي.ميمبرن چيو ته انڊس ڊيلٽا ۾ پاڻي جي کوٽ سبب زراعت ۽ ماهيگيري کي تمام گهڻو نقصان پهتو آهي، ان مسئلي کي نظر ۾ رکندي وفاقي حڪومت جي ڪئنال ٺاهڻ واري منصوبي کي سختيءَ سان رد ڪيو ويو. اجلاس ۾ سنڌ ۾ ڪينال ٺاهڻ جي رٿ جي مخالفت ۾ متفقه ٺهراءُ پاس ڪيو ويو. ان موقعي تي ضلعي چيئرمين عبدالحميد پنهور چيو ته پيپلز پارٽي هميشه سنڌ جي عوام سان گڏ بيٺي آهي.