املهه ماڻڪ ھو...!

لالا حسن پٺاڻ

“پٺاڻ تون اسان کي صفا غريب ٿو سمجھين ڇا؟” اھو جملو ماڻڪ ڪنگراڻي مونکي اڪثر چوندو ھو، خاص ڪري ان وقت جڏھن مان ان جي ڪاميابيءَ تي ساڻس مذاق ڪندو ھيس، کيس پي ٽي وي ايوارڊ مليو ھو، ان کانپوءِ اھڙن جملن جي ڏي وٺ ٿيندي ھئي. حيدرآباد ۽ ڪراچي ۾ ڪافي وقت اسان گڏ رھياسين يا ساڳي علائقي ۾ رھياسين. عمر ۾ ننڍو ھجڻ ڪري منھنجي غلط ڳالھھ يا زور زبردستي بھ مڃي وٺندو ھيو. ڀائو زلف ۽ اسان جون ڪچهريون ٿينديون ھيون. ماڻڪ جي ڪري ئي مون جھڙي بي ادب جون ڪافي اديبن، شاعرن، اداڪارن ۽ صحافين سان پر تڪلف ڪچھريون ٿينديون ھيون. سائين عزيز ڪنگراڻي، ايوب گل، طارق ڪورائي، عبدالرحمان ملڪ، واحد ڀٽو، سميت ڪافي دوستن سان ويجھڙائپ رھي. جڏھن کيس پھريون سويئر ھارٽ اٽيڪ پيو ھيو تھ مان صبح جو سوير اين آءِ سي وي ڊي پھتس، وينٽ تي ھيو، اللہ جي مھرباني، ڊاڪٽرن جي محنت ۽ دوستن جي دعائن سان وڏي مشڪل بعد کيس ھوش آيو. منھنجي لاءِ سدائين خيال ڪندڙ دوست رھيو. مون کي ڊينگي بخار ٿيو، اسپتال ۾ ھو گڏ ھيو، ڪراچي جي رھائش گاھھ تھ ۲۵ کن شرپسندن حملو ڪيو، ست اٺ دوست وٺي پھچي ويو. دل جو سٺو ۽ سنڌ دوست ماڻھو اڄ اسان کان موڪلائي ويو. اسان جو دوست رياض سھيل مون کي جڏھن بھ ماڻڪ سان گڏ ڏسندو ھيو تھ ماڻڪ جي سامھون ھڪ خاص جملو چوندو ھيو، جنھن تي ماڻڪ کلي چوندو ھو “اڙي ٿري سڌري وڃ”، ٽھڪڙو پئجي ويندو ھو. اڄ سندس لاڏاڻي جي خبر جيءَ جھوري وڌو. سمجھھ ۾ نٿو اچي تھ سائين عزيز ۽ ماڻڪ جي پُٽڙي ۽ گھر ڀاتين سان تعزيت ڪريان يا تعزيت وصول ڪيان؟ اللہ کيس جنت ۾ جاءِ ڏئي!!