ای سی سی کا نئے سولر صارفین سے بجلی کی خریداری کی قیمت میں کمی کا فیصلہ

اقتصادی رابطہ کمیٹی (ای سی سی) نے نیٹ میٹرنگ کے تحت سولر صارفین سے خریدی جانے والی بجلی کی قیمت میں کمی کردی۔ اب نئے سولر صارفین سے بجلی 27 روپے کے بجائے 10 روپے فی یونٹ میں خریدی جائے گی، تاہم یہ فیصلہ پہلے سے موجود صارفین پر لاگو نہیں ہوگا۔ وزارتِ خزانہ کے اعلامیے کے مطابق سولر صارفین سے 10 روپے فی یونٹ بجلی خریدنے کا فیصلہ موجودہ مارکیٹ حالات کو مدنظر رکھتے ہوئے کیا گیا ہے۔ ای سی سی کے مطابق نئے سولر پینل نصب کرنے والے صارفین کو نیشنل گرڈ سے بجلی آف پیک ریٹ پر فراہم کی جائے گی۔ ای سی سی کا کہنا ہے کہ سولر بجلی کی وجہ سے نیشنل گرڈ سے بجلی استعمال کرنے والے صارفین کو سستی بجلی فراہم کرنے کی کوششوں کو نقصان پہنچا ہے۔ مزید یہ کہ سولر پینل استعمال کرنے والے 80 فیصد صارفین کا تعلق ملک کے 9 بڑے شہروں سے ہے۔ ای سی سی کو دی گئی بریفنگ میں بتایا گیا کہ دسمبر 2024 تک سولر صارفین نے گرڈ صارفین پر 159 ارب روپے کا اضافی بوجھ منتقل کیا، جبکہ دسمبر 2034 تک یہ بوجھ بڑھ کر 4 ہزار 240 ارب روپے تک پہنچنے کا امکان ہے۔ بریفنگ کے مطابق دسمبر 2024 تک سولر صارفین کی تعداد 2 لاکھ 83 ہزار تک پہنچ گئی، جو اکتوبر 2024 میں 2 لاکھ 26 ہزار 440 تھی۔ اسی طرح، دسمبر 2024 تک سولر سے پیدا ہونے والی بجلی 4 ہزار 321 میگاواٹ ہو گئی، جبکہ 2021 میں یہ صرف 321 میگاواٹ تھی۔