ايس ايس پي نوشهروفيروز جي اڳواڻي ۾ مختلف شهرن ۾ فليگ مارچ

views | 07th Mar 2025 • سنڌي خبرون

نوشهروفيروز سٽي، مورو ۽ ٻين شهرن ۾ رمضان دوران امن امان جي حوالي سان فليگ مارچ ڪيو ويو

ايس ايس پي نوشهروفيروز جي اڳواڻي ۾ مختلف شهرن ۾ فليگ مارچ

نوشهروفيروز/مورو(رپورٽرز وٽان) رمضان المبارڪ جي مھيني ۾ امن امان جي حوالي سان ايس ايس پي نوشھروفيروز سنگھار ملڪ جي اڳواڻي ۾ فليگ مارچ.ايس ايس پي نوشهروفيروز سنگھار ملڪ جي نگراني ۾ رمضان جي مقدس مهيني دوران امن امان کي بهتر بڻائڻ ۽ برقرار رکڻ لاءِ نوشهروفيروز سٽي ۽ مورو سميت مختلف شهرن ۾ پوليس موبائيلن تي فليگ مارچ ڪيو ويو. فليگ مارچ ۾ سب ڊويزنل پوليس آفيسرن سميت وڏي تعداد ۾ پوليس آفيسرن ۽ اهلڪارن شرڪت ڪئي. جڏهن ته فليگ مارچ دوران ايس ايس پي نوشھروفيروز سنگھار ملڪ مورو مين روڊ، شاھي بازار جي ڪاروباري شخصيتن سان ملاقات ڪئي جنھن دوران ميڊيا سان ڳالھائيندي چيو تہ فليگ مارچ جو مقصد عوام کي تحفظ ۽ يقين ڏيارڻ آهي، امن امان جي صورتحال کي بهتر بڻائڻ ۽ برقرار رکڻ لاءِ ضلعي جي سڀني داخلي ۽ خارجي رستن تي اسنيپ چيڪنگ جو سلسلو پڻ جاري آهي سڀني گاڏين ۽ موٽرسائيڪلن جي چيڪنگ ڪئي پئي وڃي ۽ شڪي ماڻهن جي ڳولا ڪئي پئي وڃي. اعليٰ پوليس آفيسرن جي نگراني ۾ سنيپ چيڪنگ دوران، سڀني گاڏين ۽ موٽرسائيڪلن مان فينسي نمبر پليٽون، رنگين ۽ ڪارا شيشا، پريشر هارن، نيريون بتيون وغيره پڻ هٽايو پيو وڃي. ھن چيو تہ جيل معاملي جي انڪوائري ھلندڙ آھي ذميوارن تي ڪيس داخل آھي ڪنھن کي بخش نہ ڪيو ويندو ھر حوالي سان محڪماتي ڪارروائي ٿيندي، ھن چيو تہ ٽريفڪ جي نظام بھتر بڻائڻ لاءِ مورو شھر ۾ 20 ٽريفڪ پوليس اھلڪار مقرر آھن ۽ وڌيڪ پڻ مقرر ڪيا ويندا شھرين جي ھر شڪايت جو ازالو ڪيو ويندو ۽ پيادل پيٽرولنگ ڪري عوام جي جان مال جو تحفظ يقيني بڻايو ويندو.