نوشهروفيروز ۾ هالاڻي واسڻ مبينا زيادتي جو نشانو بڻيل ناري جو ماءُ سان گڏ احتجاج

ضلعي ڪائونسل ميمبر مختيار نانگور ٻن سالن تائين زنا جو نشانو بڻايو: صوبيه قاضي

نوشهروفيروز(ڊ ر )انصاف ڏياريو نوشهروفيروز ۾ ھالاڻي واسڻ عورت جو ماءُ سان گڏ پريس ڪلب آڏو احتجاج، ھالاڻي ۾ بااثر ضلعي ڪائونسل جي ميمبر جي لڳاتار زيادتي جو نشانو بڻيل نياڻي کي انصاف نه مليو، ڪيس داخل ٿيڻ باوجود نه ته جوابدار گرفتار ٿيا نه ئي وري ناري کي تحفظ مليو، رپورٽ موجب ھالاڻي ۾ ضلعي ڪائونسل جي ميمبر مختيار نانگور پاران مبينه طور ناري صوبيه قاضي کي لڳاتار ٻن سالن تائين زنا جو نشانو بڻائڻ جو ڪيس نوشهروفيروز ٿاڻي تي داخل هجڻ باوجود اڃان تائين ڪيس ۾ گهربل جوابدار مختيار نانگور ۽ سندس نياڻو سجاد علي گرفتار ناهن ٿي سگهيا نه ئي وري پوليس سندن گرفتاري لاء ڪي ڪوششون ورتيون آهن.ڪيس داخل هجڻ باوجود جوابدار گرفتار نه ٿيڻ سبب جوابدارن ناري جي زندگي زهر بڻائي ڇڏي آهي ۽ هو دربدريءَ واري زندگي گذارڻ تي مجبور آهي.هوڏانهن جوابدار گرفتار نه ٿيڻ ۽ ڌمڪيون ملڻ خلاف ناري صوبيه پنهنجي امڙ ۽ معصوم ڌيءَ سان گڏ پريس ڪلب آڏو احتجاجي مظاهرو ڪيو جتي ميڊيا آڏو دانهيندي هن چيو ته مختيار نانگور شادي جو ڪوڙو دلاسو ڏئي لڳاتار مختلف جاين تي رکي زيادتي جو نشانو بڻايو ۽ دانهون ڪرڻ تي امڙ سان ملڻ به نه ڏنو ويندو هو.هن چيو پوليس ڪيس داخل ٿيڻ کي مهينو گذرڻ باوجود جوابدار گرفتار نه ڪيا ۽ ڪيس جو جاچ آفيسر جوابدار ڌر سان ملي ڪيس کي خراب ڪرڻ جي ڪوشش ڪئي.هن چيو ته جوابدار ڌر ڪيس تان هٿ نه کڻڻ تي موتمار ڌمڪيون ڏئي رهي آهي جنهن ڪري معصوم ڌيءَ ۽ امڙ سميت مونکي جان جو خطرو آهي. هنن مطالبو ڪيو ته فوري طور جوابدار گرفتار ڪري تحفظ فراهم ڪيو وڃي ٻئي صورت ۾ مرڻ گهڙي تائين بک هڙتال شروع ڪندس.