ڪراچي: علمي ادبي فورم طرفان 9 فيبروري تي نامياري ليکڪ محمد علي پٺاڻ جي مان ۾ تقريب ٿيندي

نظر انداز ٿيل قلم ڌڻين جي مڃتا لاء تقريبن جو سلسلو تسلسل سان جاري رکيو ويندو: باني علمي ادبي فورم ڪراچي

ڪراچي (رپورٽر)ناليواري شاعر ۽ علمي ادبي فورم ڪراچي جي باني صدر پروفيسر مشتاق مهر چيو آهي ته علمي ۽ ادبي تقريبن تي مخصوص ادبي لڏي جو قبضو آھي، جنهن ڪري ڪيترن ئي سينيئر قلم ڌڻين ۽ نوجوان اديبن کي اڳتي اچڻ جو موقعو نه ملي رهيو آھي ۽ ڄاڻي واڻي سندن رستاروڪ ڪئي پئي وڃي۔ ڪراچي جي علائقي ڀٽائي آباد ۾ علمي ادبي فورم جي پندرنهن وار گڏجاڻي کي خطاب ڪندي هن چيو ته هڪ رٿابندي سان ڪجهه ادبي لابيون پنهنجا نوازي ڪري رهيون آھن۔ جنهن جي نتيجي ۾ صدارت کان ويندي اسٽيج تي ويٺلن تائين چھرا هر تقريب ۾ اٽڪل ساڳيا هوندا آھن، اهو سلسلو هاڻ بند ٿيڻ گهرجي۔ هن چيو ته اسان اهي ناڪاري روايتون ٽوڙي نظرانداز ٿيل اديين، شاعرن، دانشورن، صحافين ۽ فنڪارن کي اڳتي آڻڻ لاء علمي ادبي فورم ٺاهيو آھي، جنهن طرفان پهرين وک طور 9 فيبروري تي هڙان وڙان ٽيهارو کن ڪتاب ڇپرائيندڙ نامياري ليکڪ محمد علي پٺاڻ کي مڃتا ڏيڻ لاء تقريب ڪوٺائي وئي آھي، جنهن ۾ هو پاڻ شرڪت ڪندو ۽ سندس ٻن ڪتابن جي مهورت به ڪئي ويندي۔ پروفيسر مشتاق مهر اعلان ڪيو ته نظر انداز ٿيل قلم ڌڻين جي مڃتا لاء تقريبن جو سلسلو تسلسل سان جاري رکيو ويندو۔ علمي ادبي فورم جي گڏجاڻي ۾ عبدالستار رستماڻي، وحيد محسن، علي نواز سيفي ، غلام رسول جاجڪاڻي، عبدالعزيز ابڙي،قاضي اعجاز، علي اصغر درس،جاويد مهر، عارف سونا، طارق مشتاق، محمد خان۔ عبدالصمد ۽ محمد طاهر رستماڻي شرڪت ڪئي.