ڏوڪري: حيدر بخش جتوئي بوائز هاءِ اسڪول جو ٽرانسفارمر ۽ سرچ لائيٽون چوري

اڻڄاتل چور هاءِ اسڪول جي گرائونڊ تي لڳل 50 ڪي وي جو ٽرانسفارمر ۽ 10 سرچ لائيٽون چوري ڪري فرار

ڏوڪري (رپورٽر) ڏوڪري شھر بدامنيءَ جي ور چڙھي ويو، چوريون ۽ ٻيا ڏوھ روز جو معمول بڻجي ويا، جڏھن تہ سرڪاري ادارا پڻ ڏوھارين کان محفوظ نه رھي سگھيا، گورنمينٽ حيدر بخش جتوئي بوائز هاءِ اسڪول ڏوڪريءَ مان بجليءَ جو ٽرانسفارمر ۽ سرچ لائيٽون چوري ٿي ويو.تفصيل موجب گذريل رات اڻڄاتل چور گورنمينٽ حيدر بخش جتوئي بوائز هاءِ اسڪول ڏوڪريءَ جي گرائونڊ تي لڳل 50 ڪي وي جو ٽرانسفارمر ۽ 10 سرچ لائيٽون چوري ڪري فرار ٿي ويا. ان سلسلي ۾ ھيڊماستر نثار احمد سولنگيءَ ميڊيا سان ڳالهائيندي واقعي بابت ڄاڻ ڏني ۽ وڌيڪ ٻڌايو تہ فوري طور تي اطلاع ڏيڻ باوجود پوليس ڪا خاطر خواھ اڳڀرائي ناهي ڪئي. ھن جو چوڻ هو تہ ڏوڪري بوائز هاءِ اسڪول مان اڳ به پاڻيءَ جي موٽرن سميت ڪيتريون ئي چوريون ٿي چڪيون آهن پر انهن جي واپسيءَ لاءِ پوليس ڪو به ڪردار ادا ناھي ڪيو. ٻئي طرف استادن، ساڃاھ وندن ۽ ڏوڪريءَ جي شھرين دانھيو آهي تہ ڪافي عرصي کان ڏوڪري شھر ڏوھارين جو آماجگاہ بڻجي ويو آهي ۽ روزانو چوريون توڙي ٻيا ڏوھ معمول بڻجي ويا آهن. ھنن ايم اين اي، ايم پي اي، ڊي آءِ جي توڙي ايس ايس پي لاڙڪاڻو ۽ ڊي ايس پي ڏوڪريءَ کي اپيل ڪئي تہ ڏوھارين خلاف سخت ڪارروائي ڪري شھر کي پُر امن بڻائڻ لاءِ اثرائتا قدم کنيا وڃن. ۽ جلد کان جلد ڏوڪري بوائز هاءِ اسڪول مان چوري ٿيل ٽرانسفارمر ۽ سرچ لائيٽون واپس ڪرايون وڃن. ان حوالي سان گسٽا تعلقي ڏوڪريءَ جي اڳواڻن چتاءُ پڻ ڏنو آهي تہ جيڪڏهن چوري ٿيل ٽرانسفارمر ۽ سرچ لائٽون فوري طور تي واپس ڪرائي جوابدارن کي گرفتار نه ڪيو ويو تہ سخت احتجاج ڪيو ويندو.