ناميارو اديب، ليکڪ ۽ سينئر صحافي پروفيسر بيدار جعفري ڪراچي ۾ لاڏاڻو ڪري ويو

وڏي وزير سيد مراد علي شاهه، صوبائي وزير ناصر شاهه ۽ ٻين پاران پروفيسر بيدار جعفري جي لاڏاڻي تي ڏک جو اظهار

ملير (عبدالرشيد مورجھريو) ناميارو اديب ليکڪ ۽ صحافي پروفيسر بيدار جعفري دل جو دورو پوڻ سبب ڪراچي ۾ لاڏاڻو ڪري ويو، جنازي نماز ۾ اديبن، شاعرن، صحافين ،سياسي سماجي اڳواڻن سميت علائقي واسين جي شرڪت، تعليم ۽ صحافت جي شعبي ۾ وڏو خال پيدا ٿيو آهي، توانائي جي وزير ناصر شاهه پاران ڏک جو اظهار تفصيل موجب ناميارو اديب ليکڪ ۽ صحافي پروفيسر ديدار علي المعروف بيدار جعفري دل جو دورو پوڻ سبب ڪراچي ملير جي علائقي پپري ۾ لاڏاڻو ڪري ويو، جنازي نماز ۾ اديبن، شاعرن، صحافين، سياسي سماجي اڳواڻن سميت سندس چاهيندڙن ۽ علائقي واسين وڏي تعداد ۾ شرڪت ڪئي، پروفيسر بيدار جعفري جي وڇوڙي تي توانائي جي وزير ناصر شاهه ڏک جو اظهار ڪندي چيو ته هو نفيس ۽ بهترين طبيعت جو مالڪ هو، سندس وڇوڙي سان تعليم ۽ صحافت جي شعبي ۾ وڏو خال پيدا ٿيو آهي جيڪو ڀرجڻ انتهائي ڏکيو آهي، سندس علمي ادبي خدمتون هميشه ياد رکيون وينديون، بيدار جعفري متعلق سيد شبير شاهه جو چوڻ هو ته هو پنهنجي نالي وانگر بيدار شخص ۽ بي پناهه خداداد صلاحيتن جو مالڪ هو، بيدار هڪ شفيق استاد ۽ سنڌي توڙي اردو ۽ انگريزي زبان تي دسترس رکندڙ بهترين ليکڪ هو ۽ هن جو هڪڙو تاريخي ڪتاب "باڊهه بوند بهار" پڻ ڇپيل آهي، پروفيسر بيدار جعفري جو مڙهه سپر هاءِ وي لڳ واديءِ قبرستان ۾ سوين آلين اکين سان مٽيءَ ماءُ حوالي ڪيو ويو.