ڌاٻيجي ويجهو قومي شاهراهه تي خوفناڪ حادثو، گهوٽ سميت 4 ڄڻا اجل جو شڪار

ٺٽو(شفيق ڀٽي)ڌاٻيجي ويجهو قومي شاهراهه تي تيز رفتاري سبب ٻن ڪارن ۾ خوفناڪ ٽڪر، چار ڄڻا فوت، ٻه ڄڻا زخمي. تفصيل موجب ڌابيجي ويجهو قومي شاهراهه تي تيز رفتاري سبب ٻن ڪارين وچ ۾ خوفناڪ ٽڪر ٿيو، جنهن جي نتيجي ۾ ٻنهي گاڏين ۾ باهه لڳي وئي. حادثي ۾ هڪ عورت سميت چار ڄڻا فوت ٿي ويا آهن، جڏهن ته ٻه ڄڻا سخت زخمي آهن. ذريعن موجب حادثو ان وقت پيش آيو، جڏهن تيز رفتاري سبب ٻئي ڪارون ڊرائيورن جي ڪنٽرول کان ٻاهر نڪري ويون ۽ هو پاڻ ۾ ٽڪرائجي ويون. ڪارن جي ٽڪرائڻ سبب ٻنهي گاڏين ۾ باهه لڳي وئي، جنهن جي نتيجي ۾ هڪ عورت ياسمين ۽ ٻه ڄڻا امتياز ۽ اظهار الحسن موقعي تي فوت ٿي ويا، جڏهن ته شاهه زين زخمن جا سور نه سهندي بعد ۾ فوت ٿي ويو،خوفناڪ حادثي ۾ فوت ٿيلن جو انگ 4 ٿي ويو. حادثي زخمي ۽ فوت ٿيل ماڻهن کي فوري طور رورل هيلٿ سينٽر گهارو منتقل ڪيو ويو، جڏهن ته ٻن زخمي سخت ڳڻتي جوڳي حالت ۾ آهن جن کي ڪراچي ريفر ڪيو ويو آھي. ياد رهي ته روڊ جي تعمير جي سلسلي ۾ هڪ ٽريڪ بند آهي ۽ هڪ ئي ٽريڪ تي ٻنهي طرفن جون گاڏيون هلي رهيون آهن، جنهن سبب اهڙا حادثا روز جو معمول بڻجي ويا آهن.