نوشهروفيروز ۾ واپارين کان هٿيارن جي زور تي ڦرلٽ، شهرين ۽ واپارين جو ڌرڻو

6هٿياربندن واپارين سراج الدين، حنيف سوهو ۽ ٻين کان 4 لک رپيا، موٽرسائيڪل ۽ فونون ڦر ڪري فرار

نوشهروفيروز (رپورٽر) نوشهروفيروز وچ شهر مان ٿاڻي جي ڀر ۾ ڏينهن ڏٺي هٿياربندن پاران ديدا دليري سان واپارين کان لکين روپيا ڦر ڪري فرار ٿي ويا پڊعيدن روڊ تي 6 هٿياربندن سبزي منڊي جي واپارين سراج الدين، حنيف سوهو ۽ ٻين کان 4 لک روڪ ۽ موٽر سائيڪل ۽ موبائيل فونون ڦر ڪري فرار ٿي ويا وچ شهر مان ڏينهن ڏٺي جو ڦر خلاف شهرين ۽ دڪاندارن پاران احتجاج ڪري الله واري چوڪ تي ٽائرن کي باهيون ڏئي روڊ بلاڪ ڪري ڇڏيو ان موقعي تي اڳواڻن چيو ته ضلعي هيڊ ڪوارٽر واري شهر مان ڏينهن ڏٺي جو ڦر جون وارداتون ٿين پيون پوليس ننڊ ستل آهي ضلعي اندر بدامني ۾ اضافو ٿيندو پيو وڃي رات ته رات ڏينهن جو به هٿيار بند ٿاڻي جي ڀرسان ڦر ڪري ويا آهن جيڪا پوليس جي نااهلي آهي هنن چيو ته ايس ايڇ او نوشهروفيروز چورن سان ٻٽ بڻيل آهي جيڪو ايس ايس پي جو کاٽو پٽ هجڻ ڪري کيس هٽايو نه ٿو جنهن ڪري شهري عدم تحفظ جو شڪار بڻيل آهن هنن مطالبو ڪيو ته ڦر ٿيل روڪ رقم ۽ ٻيو سامان واپس ڪرائي ايس ايڇ او کي هٽايو وڃي ٻي صورت ۾ سخت احتجاج ڪيو ويندو