اياز لطيف پليجي پاران ڪنگري ڀرسان خوني تڪرار ۾ 5ڄڻن جي قتل تي ڏک جو اظهار

سنڌ حڪومت چاھي ٿي ته سنڌ ۾ قبيلائي رتوڇاڻ ھجي، ڌاڙيلن جو راڄ ھجي: اياز لطيف پليجو

حيدرآباد(بيورو)قومي عوامي تحريڪ جي سربراھ اياز لطيف پليجي ڪنگري ڀرسان خوني تڪرار ۾ پنج ماڻھو قتل ٿيڻ واري واقعي تي گھري ڏک ۽ افسوس جو اظھار ڪندي سنڌ حڪومت کي واقعي جو ذميوار قرار ڏنو آھي. اياز لطيف پليجي چيو آھي تہ پ پ حڪومت چاھي ٿي تہ سنڌ ۾ قبيلائي رتوڇاڻ ھجي، ڌاڙيلن جو راڄ ھجي، لاقانونيت ھجي، جھالت ھجي، عوام يرغمال ھجي، دھشت واري ماحول ۾ ماڻھو خاموش ۽ قيد ھجن. جمھوريت تي راتاھا ھڻي قائم ڪيل آمريتي دورن ۾ سنڌ کي يرغمال ڪري ائين وسيلن تي ڌاڙا ھنيا ويا، پ پ حڪومت انھن آمريتي پاليسين کي جاري رکيو آھي.اياز لطيف پليجي چيو تہ سنڌ ۾ ھزارين اسڪول بند پيل آھي. تعليم ناھي. ٻئي طرف حڪمران سنڌو درياھ سميت سنڌ جا وسيلا وڪڻي ڇڏيا آھن، درياھ کپائي اقتدار خريد ڪيو. ڪرپشن کي روڪڻ وارو ڪو بہ ناھي. سکر ۽ لاڙڪاڻي ڊويزن ۾ درجنين خوني تڪرار آھن. ڏوھارين وٽ خطرناڪ ھٿيار موجود آھن. اھي ھٿيار حڪمران وڏيرن ۽ وزيرن معرفت پھچن ٿا. اياز لطيف پليجي چيو تہ سنڌ ۾ پوليس آزاد ناھي. مرضي جا ايس ايس پي، ڊي ايس پيز ۽ ايس ايچ اوز مقرر ڪري انھن کي ذاتي مفادن ۽ مخالفن کان انتقام لاءِ استعمال ڪيو وڃي ٿو. باقي انتظاميه کي بہ ائين غلام ڪري ھلايو وڃي ٿو، جنھنڪري سنڌ ۾ قانون جي حڪمراني ناھي. سنڌ ۾ جيڪو جيترو طاقتور آھي، اھو ايترو ئي ظالم، جابر ۽ عوام دشمن آھي. اياز لطيف پليجي چيو تہ پ پ حڪومت چاھي ھا تہ سنڌ ۾ قانون ۽ انصاف جي حڪمراني قائم ٿي وڃي ھا پر افسوس آھي جو اقتدار جي 17 سالن ۾ سنڌ اھو حشر ڪيو ويو آھي جيڪو ضيا ۽ مشرف بہ نہ ڪري سگھيا.اياز لطيف پليجي چيو تہ ڪنگري ڀرسان پنج ماڻھن جي قتل جا ذميوار گرفتار ڪيا وڃن. متاثرن کي تحفظ ڏنو وڃي تہ جيئن ٻيا ماڻھو قتل نہ ٿين. قانون ۽ انصاف جي حڪمراني قائم ڪئي وڃي.