سنڌ درياھ تي ڌاڙو لڳو ۽ 6 نوان ڪئنال ٺھيا تہ سنڌ مقتل گاھ بڻجي ويندي: اياز لطيف پليجو

حيدرآباد (بيورو) قومي عوامي تحريڪ جي سربراھ اياز لطيف پليجي چيو تہ سنڌ درياھ تي ڌاڙو لڳو ۽ 6 نوان ڪئنال ٺھيا تہ سنڌ مقتل گاھ بنجي ويندي. سنڌ جا ماڻھو سنڌ حڪومت مان اميد ڪرڻ بدران سنڌو درياھ، پنھنجي حقن لاء ۽ خراب حڪمراني خلاف جدوجھد تيز ڪن. اصل طاقت پورھيت، ھاري ۽ محنت ڪش عوام آھي. سنڌ جا ماڻھو مصلحتن خاموش ويھڻ ۽ ٻين جي اٿڻ جو انتظار ڪرڻ بدران پنھنجي حصي جو ڪردار ادا ڪن. ناانصافيون بدراشت نہ ڪيو. حق ۽ سچ جو آواز بلند ڪيو. حڪمران ڪمزور آھن. عوام کي خاموشي ڪرپٽ حڪمرانن کي طاقتور بنائي ٿي.اياز لطيف پليجي چيو تہ غريب، پورھيت، ھاري پنھنجي بنيادي حقن لاء ٻڌي ڪن. قومي عوامي تحريڪ ۾ شامل ٿي قومي، انساني ۽ بنيادي حقن جي جدوجھد لاءِ اڳتي اچن. 17 سال ۾ ھڪ نئون نسل جوان ٿي وڃي ٿو. پ پ حڪومت سنڌ کي پوئتي ڌڪي ڇڏيو آھي. زراعت بدحال ٿي آھي. پاڻي تي ڌاڙا لڳي رھيا آھن. قومي وسيلا ۽ لکين ايڪڙ زمين تين وال ٿي آھي. ڪا بہ نئين صنعت ۽ نئين يونيورسٽي قائم نہ ٿي آھي. حڪمرانن مان ڪو بيمار ٿئي ٿو تہ اھو سنڌ جي اسپتالن مان علاج ڪرائڻ بدران دبئي، آمريڪا يا ٻين ملڪن ڏانھن علاج لاءِ ڀڄي وڃي ٿو. سنڌ جي سرڪاري اسپتالن ۾ ملندڙ دوائون نقلي آھن. ٽيسٽن جون سھولتون ناھن. اڪثر اسڪولن ۽ ڪاليجن کي حالت بہ بدتر آھي. اياز لطيف پليجي چيو تہ سنڌ ۾ حڪومت بدران مافياز جو راڄ آھي. منشيات، ڦورو، ڌاڙيل، لينڊ گريبر، نقلي دوائون، نقلي ڀاڻ، نقلي ٻج، کاڌي پيتي جي شين ۾ ڪيميڪل جي ملاوٽ ڪندڙ ۽ ٻي مافيا ايتري طاقتور آھي جو انھن خلاف ڪير بہ ڪارروائي ڪرڻ لاء تيار ناھي. نوڪريون وڪرو ڪندڙ ۽ ڊگريون وڪرو ڪندڙن کي وزيرن جي سرپرستي حاصل آھي. سرڪاري آفيسن ۾ ڪرپٽ مافياز آھي. جيڪو جيترو طاقتور آھي اھو پنھنجي مرضي جا قانون ٺاھي ويٺل آھي.