پاڻي روڪي سنڌ کي ڀت سان لڳايو ويو ته سنڌ جو ٻچو ٻچو مزاحمت ۽ مقابلو ڪندو: اياز لطيف پليجو

سنڌ جي مستقل رھندڙن جون خوشيون ۽ تڪليفون گڏيل آھن

حيدرآباد(بيورو) قومي عوامي تحريڪ جي سربراھ اياز لطيف پليجي چيو آھي تہ اسين قوم دوستي ۽ وطن دوستيءَ تي يقين رکون ٿا. پنھنجي قوم ۽ مذھب تہ سڀني نہ کي پسند آھي پر انسانيت مٿانهون سمجھڻ وڏو امتحان آھي. سنڌ جي مسقتل رھندڙن جون خوشيون ۽ تڪليفون گڏيل آھن. پاڻي روڪي سنڌ کي ديوار سان لڳايو ويو تہ سنڌ جو ٻچو ٻچو مزاحمت ۽ مقابلو ڪندو. سڄي سنڌ پاڻي لاء جدوجھد جي ميدان تي آھي. اياز لطيف پليجي چيو تہ پاڪستان جي ماڻھن کي جوڙڻ جي ضرورت آھي پر ڪرپٽ حڪمرانن ملڪ کي ورھائي ڇڏيو آھي. بلوچستان، خيبرپختونخواهه ۽ سنڌ جا ماڻھو برابري واري جمھوريت ۽ پنھنجن وسيلن جي مالڪي چاھين ٿا. سنڌ جو ٻھراڙيون گئس، بجلي سميت بنيادي سھولتون کان محروم آھن. سنڌ مان گئس نڪري ٿي پر سنڌ جا اڪثر علائقا انھي سھولت کان محروم رکيا ويا آھن. ٿرپارڪر جا اڪثر علائقا بجلي کان محروم آھن، جتان جي بجلي پنجاب کي فراھم ڪئي وڃي ٿي. اياز لطيف پليجي چيو تہ سنڌ کي ھٿ وٺي منشيات جو ڍير بنايو ويو آھي تہ جيئن سنڌ جو نوجوانن کي منشيات ۾ مبتلا ڪري وسيلن ۽ دولت کي لٽي سگھجي. پيپلز پارٽي جي خراب حڪمراني سنڌ جي ماڻھن کي فقير بنائي ڇڏيو آھي. نوڪرين، روزگار ۽ وسيلن تي ڌاڙا ھنيا پيا وڃن. ھاڻ اقتدار خاطر درياھ کي وڪرو ڪيو پيو وڃي. اياز لطيف پليجي چيو تہ پاڪستان کي نئين اقتصادي، آئيني ۽ سماجي چارٽر جي ضرورت آھي. ھيٺيون ۽ پورھيت طبقو پٿر جي دور ۾ جيئڻ تي مجبور آھي. وفاق سنڌ سان بجلي، گئس، ٽيڪسز ۽نہ پاڻي جي سلسلي ۾ زيادتيون بند ڪري.