ملير: گلشن حديد جي اربع بازار ۾ باڊهه واسي نوجوان افغاني پٺاڻ هٿان ڇريون هڻي قتل، قومي شاهراهه تي ڌرڻو

جوابدار زمين خان ڇرين جا وار ڪري باڊهه واسي زاهد ميراڻي کي قتل ڪري فرار ٿي ويو

ملير (ڊ ر) گلشن حديد ۾ اربع بچت بازار ۾ معمولي ڳالهه تان جهيڙو، جوابدار ڇُرين جا وار ڪري نوجوان کي قتل ڪري ڇڏيو، جوابدار فرار، وارثن جو لاش قومي شاهراهه تي رکي ڌرڻو، ڪيترن ئي ڪلاڪن تائين ٽريفڪ معطل، ڌرڻي ۾ جسقم چيئرمين صنعان قريشي جي شرڪت، 24 ڪلاڪن ۾ قاتل گرفتار نه ٿيا ته ٻيهر قومي شاهراهه تي ڌرڻو هنيو ويندو: صنعان قريشي، پوليس ۽ مظاهرين وچ ۾ ڳالهين بعد ڌرڻو ختم ڪيو ويو، خبر موجب: اسٽيل ٽائون ٿاڻي جي حد گلشن حديد ۾ لڳندڙ اربع بچت بازار ۾ ٻن دڪاندارن وچ ۾ معمولي ڳالهه تان جهيڙو ٿي پيو جنهن جي نتيجي ۾ جوابدار زمين خان ڇُري سان وار ڪري نوجوان زاهد ميراڻي کي قتل ڪري ڇڏيو، جوابدار واقعي واري هنڌ تان فرار ٿي ويو، واقعي بعد بازار مڪمل طور بند ڪرائي وئي ۽ مقتول جا وارث پهچڻ تائين سخت احتجاج ڪيو ويو، واقعي جي اطلاع تي پوليس واقعي واري هنڌ پهچي ضروري ڪارروائي شروع ڪئي، ٻئي پاسي مقتول نوجوان جي وارثن لاش اسٽيل ٽائون قومي شاهراهه تي رکي ڌرڻو هنيو ڌرڻي سبب ٺٽو ڪراچي ايندڙ ويندڙ ٽريفڪ ڪيترن ئي ڪلاڪن تائين بند رهي، ڌرڻي ۾ جسقم چيئرمين صنعان خان قريشي شرڪت ڪري مقتول جي وارثن سان يڪجهتي جو اظهار ڪيو، ان موقعي تي صنعان قريشي صحافين سان ڳالهائيندي چيو ته سنڌ ڌرتي تي پنهنجي وارثن کي بيدردي سان ڇُريون هڻي قتل ڪيو وڃي ٿو جيڪو سراسر ظلم آهي اسان قاتلن جي گرفتاري تائين مقتول جي وارثن سان گڏ آهيون، ڌرڻي ۾ اسان جو مطالبو آهي ته قاتلن کي گرفتاري ڪري کين قانون جي ڪٽهڙي ۾ آندو وڃي، ٻئي پاسي مقتول نوجوان زاهد ميراڻي جي وارثن جو چوڻ هو ته زمين خان نالي پٺاڻ ۽ سندس ساٿين بيگناهه اسان جي نوجوان کي ڇُرين جا وار ڪري بيدردي سان قتل ڪيو آهي، پوليس هن مهل تائين جوابدار کي گرفتار نه ڪري سگهي آهي، قاتلن کي گرفتار ڪري کين سزا ڏني وڃي، هوڏانهن ايس ايس پي ملير ڪاشف آفتاب عباسي ڌرڻي واري هنڌ پهچي وارثن سان ڳالهيون ڪري 24 ڪلاڪن اندر جوابدارن کي گرفتار ڪرڻ جي خاطري ڪرائي، جنهن بعد ڌرڻو ختم ڪيو ويو.