جسقم پاران سنڌو درياءَ تي 6 ڪئنال اڏڻ واري منصوبي خلاف قومي شاهراھ تي ڌرڻي جو اعلان

22نومبر تي نوشهروفيروز باء پاس تي ڌرڻو ھنيو ويندو، ان لاءِ تياريون جاري آهن: ڊاڪٽر نياز ڪالاڻي

نوشهروفيروز( ڊ ر)جسقم پاران سنڌو درياءَ تي 6 ڪئنال اڏڻ واري منصوبي خلاف قومي شاهراھ تي ڌرڻو ھڻڻ جو اعلان ڪيو ويو آھي. جيئي سنڌ قومي محاذ جو اڳواڻ ڊاڪٽر نياز ڪالاڻي، سرفراز ميمڻ، ڪامريڊ اياز راڄپر،امتياز کوسو ۽ ٻين سان گڏ پريس ڪلب نوشهروفيروز ۾ پريس ڪانفرنس ڪندي ڊاڪٽر نياز ڪالاڻيءَ وڌيڪ چيو ته 22 نومبر تي نوشهروفيروز باء پاس تي ڌرڻو ھنيو ويندو ۽ ڌرڻي کي ڪامياب ڪرڻ لاءِ تياريون جاري آهن. ھن چيو ته اسان جو جياپو سنڌوءَ درياءَ ۾ آهي جنهن ڪري اسان کي سنڌو تي ڪوبه ڪئنال قبول ناھي. ڇاڪاڻ ته سنڌوءَ مان ڪئنال ڪڍي سنڌ کي سڪايو ويندو. ھن چيو ته سنڌو درياءَ جو جياپو ئي سنڌ جو جياپو آھي ۽ پنجاب سنڌ جو سدائين استحصال ڪيو آھي. ھن چيو ته آصف زرداري ڪئنال منصوبي تي صحيح ڪري سنڌ سان غداري ڪري پنهنجو نالو وقت تي اڳوڻي حڪمران ايوب کهڙو جيان غدارن واري لسٽ ۾ لکرائي ڇڏيوآھي ۽ پ پ ڪئنال منصوبي تي ٻھروپئي وارو ڪردار ادا ڪري رھي آھي. ھن چيو ته بلاول جو ڪئنالن خلاف ڏنل بيان جي آجيان ڪيون ٿا پر جيڪڏھن بلاول سچو آھي تہ ڪئنالن خلاف سنڌ ۽ بلوچستان اسيمبلين مان قرار پاس ڪرائي ڇاڪاڻ ته ٻنهي صوبن ۾ پ پ جي حڪومت آھي ۽ قومي اسيمبلي ۾ ڀرپور آواز اٿاري. ھن چيو ته پنجاب رڳو سنڌ جا وسيلا لٽي رھيو آھي ۽ ھاڻي سنڌ جو باقي پاڻي به کسي سنڌ جي تھذيب کي تباھ ڪرڻ چاھي ٿو. ھن چيو ته سنڌو درياءَ تي ڪئنالن جي اڏاوت خلاف احتجاج کي وڌيڪ سگھارو بڻايو ويندو ۽ پنجاب ڏانھن ويندڙ رستا بند ڪيا ويندا.