سجاول ضلعي ۾ 150 اسڪول مستقل ۽ 33 اسڪول عارضي طور بند پيل

سجاول ۾ ڊي سي زاھد حسين رند جي صدارت هيٺ ڊسٽرڪٽ سروس ڊليوري ڪميشن جو اجلاس

سجاول(گلشيرميربحر) ڊپٽي ڪمشنر زاھد حسين رند جي صدارت ھيٺ ڊسٽرڪٽ سروس ڊليوري ڪميشن جو اجلاس منعقد ٿيو، جنھن ۾ ڊسٽرڪٽ ايجوڪيشن آفيسر سيڪڊري پيار علي خواجہ، ڊسٽرڪٽ ايجوڪيشن آفيسر پرائمري واجد علي جکراڻي، چيف مانيٽرنگ آفيسر اصغر علي شاھ، آر ايس يو، ايل ايس يو جي نمائندن ۽ ٻين لاڳيپل عملدارن شرڪت ڪئي. اجلاس ۾ ضلعي سجاول ۾ بند پيل سرڪاري اسڪولن کي فعال بڻائڻ سميت انفراسٽرڪچر جي حوالي سان غور ويچار ڪيو ويو. اجلاس کي بريفنگ ڏيندي چيف مانيٽرنگ آفيسر ٻڌايو تہ ضلعي ۾ 150 اسڪول مستقل جڏھن تہ 33 اسڪول عارضي بند پيل آھن. ان موقعي تي ڊپٽي ڪمشنر زاھد حسين رند تعليم کاتي جي ضلعي عملدارن کي ھدايت ڪئي تہ ھو ٽي اي اوز سان گڏجي سمورن بند پيل اسڪولن جو دورو ڪري صورتحال جو جائزو وٺن ۽ ايندڙ گڏجاڻي ۾ ھڪ تفصيلي جامع رپورٽ پيش ڪئي وڃي جنھن ۾ بند پيل اسڪولن جا سبب پڻ ڄاڻايل ھُجن تہ جيئن انھن اسڪولن کي فعال بڻائڻ لاءِ حڪمت عملي جوڙي سگهجي. ھُن کين وڌيڪ ھدايت ڪئي تہ ضلعي ۾ ھلندڙ بھتر پرائمري توڙي سيڪندري اسڪول جن جي انرولمينٽ زيادہ ھُجي انھن جي پڻ لسٽ جلد فراھم ڪئي وڃي تہ جيئن انھن اسڪولن کي ترجيحي بنيادن تي فرنيچر ۽ ٻيون گهربل سھولتون فراھم ڪري سگهجن. ڊپٽي ڪمشنر چيو تہ سرڪاري تعليمي ادارن کي درپيش مسئلن جي حل لاءِ ڪوششون ورتيون پيون وڃن تہ جيئن بھتر تعليم جي فراھمي سميت ٻارڙن کي ھر ممڪن سھولتن جي فراھمي کي يقيني بڻائي سگهجي. ھُن چيو تہ تعليم جي شعبي ۾ بھتر ۽ معياري سھولتن جي فراھمي ضلعي انتظاميہ جي ترجيحن ۾ شامل آھي.