سنڌ جو عوام سنڌو درياء تي نون ڪئنالن وارن منصوبن کي هرگز برداشت نه ڪندو: ڪاشف سعيد شيخ

سنڌو درياهه تي ڊيم ۽ ڪينال تعمير ڪرڻ سان سنڌ جون لکين ايڪڙ زمينون بنجر بڻجي ويون آهن

ڪراچي(اسٽاف رپورٽر) جماعت اسلامي سنڌ جي امير ڪاشف سعيد شيخ چيو آهي ته پيپلزپارٽي جي 26ھين آئيني ترميم کان وٺي ارسا ائڪٽ ۾ ترميم تائين مفاداتي پاليسن سنڌ کي ناقابل تلافي نقصان پهچايو آھي جيڪڏهن سنڌو مٿان نوَن ڪئنالن جو فيصلو واپس نه ورتو ويو ته سڄي سنڌ سراپا احتجاج بڻجي ويندي. سنڌ جو عوام ڪڏهن به پنهنجي حقن ۽ وسيلن تان دستبردار نه ٿيندو نه ئي سنڌو تي ناجائز ڌاڙو برداشت ڪندو. وڏي وزير مراد علي شاهه جو اهو بيان ته “ سنڌو تي ڪئنال اڏڻ جي مخالفت ڪئي هئي، پر منظوري خبر ناهي ڪيئن ٿي” واري ڳالهه نسورو ڪوڙ ۽ سنڌ جي عوام جي اکين ۾ سُرمون وجهڻ کان سواءِ ٻيو ڪجهه به ناهي، پيپلزپارٽي جي ڪو چئيرمين آصف علي زرداري ارسا ائڪٽ ۾ تبديلي جي منظوري ڇو ڏني، پ پ گرين پاڪستان منصوبي ۽ هاڪس بي لاءِ سنڌ جون لکين ايڪڙ قيمتي زمينون عسڪري ادارن حوالي ڪرڻ جي هامي ڀري آهي جڏهن ته ڪارونجهر جي ڪٽائي کان وٺي بحريه ٽائون کي زمينون ڏيڻ به سندس سنڌ دشمن منصوبن ۾ شامل آهي. جماعت اسلامي سنڌ جي ساڃاهه ونڌ ۽ سڄڻن سان گڏجي ڪري سنڌوءُ مٿان نوان ڪينال اڏڻ جي هر فورم تي ڀرپور جدوجهد جاري رکندي ۽ سنڌ جي مفادن تي ڪو به سمجهوتو نه ڪيو ويندو. سنڌ جي امير اڄ هڪ بيان ۾ وڌيڪ چيو ته مُراد علي شاهه جي احتجاج باوجود جيڪڏهن وفاقي حڪومت چولستان سميت نوان ڪئنال اڏڻ تي بضد آهي ته کيس استعفى ڏئي گهر هليو وڃڻ گهرجي ۽ پيپلزپارٽي وفاق ۾ نواز ليگ حڪومت سان سهڪار ختم ڪري سنڌ جو عوام تڏهن سمجهندو ته واقعي پ پ سنڌ جي مفادن جي سوديبازي نه ڪندي نه ته اهي واڳون وارا ڳوڙها ڳاڙڻ بند ڪيا وڃن. سنڌو درياهه تي ڊيم ۽ ڪينال تعمير ڪرڻ سان سنڌ جون لکين ايڪڙ زمينون بنجر بڻجي ويون آهن، وري جي نوان ڪئنال ٺهيا ته سنڌ مڪمل طور بنجر بڻجي ويندي، سنڌ جو عوام سنڌو درياء نون ڪئنالن وارن منصوبن کي هرگز برداشت نه ڪندو. هن وقت به 1991ع پاڻي ٺاهه تحت گذريل ڪيترين ئي سالن کان مسلسل سنڌ کي سندس حصي جو پاڻي نٿو ملي، سامونڊي پٽي جي لکين ايڪڙ ايراضي زمين سمنڊ جي زهريلي سيلاب ۽ چاڙھ ڳڙڪائي خراب ڪري ڇڏي آهي ۽ لکين ماڻهو پنهنجا اباڻا اجها ڇڏي دربدري واري زندگي گذارڻ تي مجبور آهن، جڏهن ته لکين ايڪڙن تي مشتمل تمر جا ٻيلا پڻ ختم ٿي ويا آهن ۽ مڇي مرڻ جو انگ گهٽ، جهنگلي جيوت جا ڪيترائي قسم ناپيد ٿي ويا آهن، پکين جا ڪيترائي قسم ختم ٿي ويا آهن. اهڙي صورتحال ۾ جڏهن اڳ ۾ طئي ٿيل معاهدن موجب سنڌ کي ضرورت مطابق پاڻي نه ملي رهيو آهي ويتر اهڙي صورتحال ۾ ڇهه نوان ڪينال ڪڍڻ جو مطلب سنڌ کي ڀڙڀانگ ۽ ٿر ۾ تبديل ڪري ڇڏيندو. جيڪڏهن حڪمران پنهنجي ھوڏ تان نه لٿا ته ان جا نتيجا چڱا نه نڪرندا. سنڌوءُ سنڌين جي جياپي جو نالو آهي ان تي بند ٻڌڻ ۽ ڪينال ڪڍڻ وارن حڪمرانن ۽ سندن سهولتڪارن خلاف سڄي سنڌ جي عوام کي متحد ڪري هر شهر ۽ وسندي ۾ زبردست احتجاجي تحريڪ هلائينداسين.#