نوشهروفيروز ۾ قومي مزاحمتي ۽ جمالياتي شاعر گدا حسين خاصخيلي کي ڀيٽا پيش ڪرڻ لاءِ تعزيتي ميڙاڪو

تعزيتي ميڙاڪي جي صدارت جيئي سنڌ محاذ جي چيئرمين عبدالخالق جوڻيجو ڪئي

نوشهروفيروز(ڊ ر)سنڌ جي ناليواري قومي مزاحمتي ۽ جمالياتي شاعر گدا حسين خاصخيلي جي ڪيل خدمتن کي ڀيٽا پيش ڪرڻ لاءِ جيئي سنڌ محاذ ضلعي نوشھروفيروز پاران تعزيتي ميڙاڪو ڪوٺايو ويو جنھن جي صدارت جيئي سنڌ محاذ جي چيئرمين عبدالخالق جوڻيجو ڪئي جڏھن تہ ھاشم کوسو، عبدالجبار کوسو، حبيب مشوري، منظور خاصخيلي مھمان طور شرڪت ڪئي. ھن تعزيتي ميڙاڪي ۾ شھرين، اديبن، سياسي سماجي ڌرين، جسم، ترقي پسند پارٽي، سنڌي ادبي سنگت، صحافين، قومي ورڪرن، سگھڙن، نارين ۽ سول سوسائٽي، قومپرست حلقي سان واسطو رکندڙن پڻ وڏي انگ ۾ شرڪت ڪئي ان موقعي تي صدارتي خطاب ڪندي چيو تہ گدا ھڪ قومي انقلابي مزاحمتي جمالياتي شاعر ھو جنھن پنھنجي شاعري ذريعي عوامي سجاڳي پيدا ڪئي ھو ڌرتي تي امن ۽ پيار جو شاعر ھو جنهن پنهنجي قلم سان سنڌ جي سورن ۽ ماروئڙن جي دردن کي لکيو ۽ سادگيءَ سان گيڙو ويس ۾ ھميشھ امن جو سفير رھيو. ھن تڪليفن باوجود پاڻ کي پوئتي نہ رکيو، نہ ئي وڪرو ڪيو ۽ گدا جهڙا ارڏا ۽ بهادر شاعر صدين کان پوءِ جنم وٺندا سندس سنڌ ڌرتي، شاعري علم ادب ۽ ماروئڙن لاءِ خدمتون ڪڏھن به نه وسرنديون. ان کان اڳ گدا حسين خاصخيلي جي آخري آرام گاه تي گلن جي چادر چاڙهي وئي ۽ تعزيتي ميڙاڪي ۾ صوفي راڳين فقير هادي بخش بهڻ ۽ گدا خاصخيلي جي فرزند فقير لطف علي خاصخيلي صوفياڻا ڪلام ڳائي ويٺلن ۾ وجد طاري ڪري ڇڏيو. جڏھن تہ ھن ميڙاڪي ۾ گلبهار مري ، محرم چنو ،حسن فدا خاصخيلي، قربان کوسو، انيس خاصخيلي عمران کوسو، لطيف خاصخيلي، حاجن جانوري، سبحان سوز جتوئي ۽ ٻيا پڻ موجود ھئا.