شڪارپور بچايو تحريڪ پاران بدامني، ٻارڙن جي اغوائن خلاف ٻئي ڏينهن به احتجاج، علامتي ڪيمپ قائم

شهر ۽ ڀرپاسي بدامني جي باهه ڀڙڪيل آهي، ڌاڙيلن پيرسن ماڻهن ۽ معصوم ٻارڙن کي به بخش نٿا ڪن: اڳواڻ

شڪارپور ( احسان ابڙو ) شڪارپور بچايو تحريڪ پاران شھر ۾ وڌندڙ بدامني، معصوم ٻارڙن جي اغوائن، چورين، ڦُرون، ڌاڙن، ۽ منشيات جي ڪاروبار خلاف ٻئي ڏينھن بہ شھر جي لکيدر گھنٽا گھر چوڪ تي پرامن احتجاجي علامتي ڪيمپ لڳائي وئي. احتجاج مظاھري ۾ شڪارپور بچايو تحريڪ جي چيئرمين الاھي بخش شيخ، جنرل سيڪريٽري عبدالوهاب ڪاغذي ، جوائنٽ سيڪريٽري صاحبزاده فضل ﷲ نوراني، پريس سيڪريٽري عبدالغفور دايو، ايڊوڪيٽ علي اصغر پھوڙ، مولانا صبغت ﷲ قادري. عبدالفتاح مھر، ڏاڏو طاھر سومرو، عبدالحنان بگن سومرو، عبدالرشيد رند، مولانا مفتي طاھر سھندڙو، حاجي گلزار احمد شر، ۽ ابوبڪر بکراڻي شرڪت ڪئي، جڏهن ته وڏي انگ ۾ شھرين به احتجاج ۾ شرڪت ڪئي.احتجاج جو مقصد شھر ۾ وڌندڙ بدامني، خاص طور تي ناصر بکراڻي ۽ وليد ميمڻ جي اغوائن تي پوليس ۽ حڪومت جي ڌيان ڇڪائڻ هو. احتجاج ڪندڙن انتظاميا کان مطالبو ڪيو ته امن امان جي صورتحال کي فوري طور تي بھتر بڻايو وڃي، معصوم ٻارڙن جي حفاظت کي يقيني بڻايو وڃي، ۽ جوابدارن کي گرفتار ڪري سخت سزا ڏني وڃي.شڪارپور بچايو تحريڪ جي اڳواڻن پنهنجي خطاب ۾ چيو ته شھر جي عوام لاءِ بدامني ۽ معصوم ٻارڙن جي اغوائن کي برداشت ڪرڻ هاڻي ناممڪن ٿي ويو آهي. اھا صورتحال نه صرف شھرين جي ذهني سڪون تي اثرانداز ٿي رهي آهي، پر انھن جي روزمره زندگيءَ تي به ناڪاري اثر وجهي رهي آهي. اڳواڻن خبردار ڪيو ته جيڪڏھن انتظاميا ان مسئلي تي فوري طور تي قدم نه کنيا ته احتجاجي مظاهرا جاري رکيا ويندا ۽ وڌيڪ سخت اپاءَ به ورتا ويندا.