ٺٽي ۾ قدرتي آفتن جي روڪٿام ۽ بچاءُ جو عالمي ڏينھن ملھائڻ بابت تقريب منعقد

ضلعي حڪومت ضلعي اندر ايندڙ قدرتي آفتن کي مُنھن ڏيڻ لاءِ ھر وقت تيار رھندي آئي آھي: منور عباس سومرو

ٺٽو(ڊ ر) سنڌ ڪميونٽي فائونڊيشن ۽ ڊزاسٽر مينيجمينٽ اٿارٽي طرفان قدرتي آفتن جي روڪٿام ۽ بچاءُ جو عالمي ڏينھن ملھائڻ بابت دربار ھال ڊي سي آفيس مڪلي ۾ تقريب منعقد ڪئي وئي. ان موقعي تي ڊپٽي ڪمشنر منور عباس سومرو ڳالھائيندي چيو تہ ضلعي حڪومت ضلعي اندر ايندڙ قدرتي آفتن کي مُنھن ڏيڻ لاءِ ھر وقت تيار رھندي آئي آھي. ھُن چيو تہ تازو ئي برساتن سبب جيڪو نقصان ٿيو ان جي ازالي ۽ حل لاءِ ڪوششون ڪيون آھن. ڊپٽي ڪمشنر ان ڳالھ تي زور ڀريو تہ مستقل بنيادن تي اھڙي حڪمت عملي جوڙڻ جي ضرورت آھي تہ جيئن ايندڙ نقصانن کي وقتائتي نموني سان مُنھن ڏئي سگهجي. ھُن چيو تہ اين جي اوز سميت سمورن لاڳاپيل ادارن کي گهرجي تہ ھو نہ فقط قدرتي آفتن دوران پر عام ڏينھن ۾ پڻ پاڻ ۾ ويجهي رابطي ۾ رھندي قدرتي آفتن کي مُنھن ڏيڻ لاءِ ھر وقت تيار رھن تہ جيئن آفتن دوران نقصانن کان بچي سگهجي. ھُن چيو تہ طوفانن ۽ ٻوڏ سميت آفتن کان عوام کي تحفظ فراھم ڪرڻ لاءِ محفوظ پناھگاھون بڻائڻ وقت جي اھم ضروت آھي. ان موقعي تي ايگزيڪيوٽو ڊائريڪٽر سنڌ ڪميونٽي فائونڊيشن جاويد حسين ھالائي ڳالھائيندي چيو تہ طوفانن ۽ آفتن کان بچڻ لاءِ ساحلي پٽي تي اھڙا سينٽر ٺاھڻ گهرن جتي ماڻھن کي طوفانن ۽ ٻوڏ کان بچاءُ لاءِ محفوظ بڻائي سگهجي. ان موقعي تي پروجيڪٽ مينيجر ايس سي ايف حميرا علي، پروجيڪٽ ڪوآرڊينيٽر عبداللہ خان، ڊپٽي ڊائريڪٽر سوشل ويلفيئر خدا بخش بھراڻي ۽ ٻين پڻ قدرتي آفتن جي روڪٿام ۽ بچاءُ بابت روشني وڌي. تقريب ۾ مختلف کاتن جي عملدارن ۽ اين جي اوز جي نمائندن شرڪت ڪئي