سجاول جي وارڊ نمبر 11 جا رهواسي ورھين کان پيئڻ جي پاڻي کان محروم، احتجاجي مظاھرو

سجاول جي وارڊ نمبر 11 جا رهواسي ورھين کان پيئڻ جي پاڻي کان محروم، احتجاجي مظاھرو

سجاول (رپورٽر) سجاول شهر جي وارڊ نمبر 11 جا رهواسي ڪافي سالن کان پيئڻ جي پاڻي کان محروم، نياڻيون ٻارڙا پاڻي ڀرڻ لاءِ شهر جي گهرن ۽ گهٽين ۾ دربدر ٿيڻ تي مجبور، واسين جو پاڻي لاءِ احتجاج، تفصيل موجب : سجاول شهر جي وارڊ نمبر11جا رهواسي گذريل ڪافي سالن کان پيئڻ جي پاڻي کان محروم هجڻ ڪري مردن عورتن ۽ ٻارن مٿي تي دلا، مٽ ۽ بالٽيون کڻي احتجاج ڪيو ان موقعي تي واسين خمون جوڳي، محمد موسيٰ ملاح، منو ميمڻ، عارب ڦوٽاڻي، حاجي ماڇي، خدابخش ملاح، جاني ڪونجڙو، ميگهو مل، گوو مل، مائي سوناري، مائي قضو ۽ ٻين چيو ته 500 کان به وڌيڪ گهرن تي مشتمل اسان جو قديمي ڳوٺ الهڏنو ملاح ۽ ڳوٺ هاشم جوڳي جنهن کي وارڊ نمبر 11 سڏيو وڃي ٿو جنهن کي سال 2010ع واري مها ٻوڏ ۾ هڪ فلاحي اداري هينڊي ڪيپ طرفان شهر جي پراڻي مڇي مارڪيٽ کان اسان جي ڳوٺ تائين پاڻي جي پائيپ لائين لڳائي ڏني وئي جيڪا ڪجه سال هلڻ کان پوءِ مڇي مارڪيٽ ڀرسان نيون اڏاوتون ٺھڻ سبب ماڻھن اسان جي پائيپ لائين تي پنهنجا نوان ڪنيڪشن ۽ وال لڳائي پاڻي بند ڪري ڇڏيو آهي جنهن سبب اسان پاڻي ڦڙي لاءِ پريشان آهيون، هر روز صبح ۽ شام اسان جون عورتون ۽ ٻارڙا هن قهر جي گرمي ۾ پاڻي جي ڳولا ۾ شهر جي گهرن ۽ گهٽين ۾ دربدر ۽ تذليل ٿي پاڻي ڀري اچن ٿيون، ڳوٺاڻن چيوته اسان جو تمام وڏو ۽ قديمي ڳوٺ آهي پر افسوس سان چوڻو ٿو پوي ته ضلع انتظاميه توڙي چونڊيل نمائندن اڄ ڏينهن تائين ڪنهن به اسان جي سار ناهي لڌي. ڳوٺاڻن وڌيڪ چيو ته اسان ڪافي ڀيرا چونڊيل نمائيندن سان ڳالهايو آهي پر سواءِ دلاسن جي ٻيو ڪجهه به ناهي مليو. ڳوٺاڻن ڊي سي سجاول، تڪ جي چونڊيل نمائندن، ٽائون چيئرمين سيد آفتاب شاه شيرازي ۽اعليٰ اختيارين کي مطالبو ڪندي چيو ته اسان جي ڳوٺ ۾ پاڻي جو مسئلو جلد کان جلد حل ڪري ڏنو وڃي ٻي صورت ۾ احتجاج جو دائرو وڌائينداسين.