رتوديرو: ويسر ڌرين ۾ جهيڙي دوران زخمي ٿيل نوجوان دم ڏئي ڇڏيو، مارجي ويلن جو انگ وڌي 2 ٿي ويو

رتوديرو: ويسر ڌرين ۾ جهيڙي دوران زخمي ٿيل نوجوان دم ڏئي ڇڏيو، مارجي ويلن جو انگ وڌي 2 ٿي ويو

رتوديرو ۾ ويسر برادري جي ٻن ڌرين ۾ ٿيل جهيڙي ۾ زخمي ٿيل ھڪ نوجوان فوت ٿي ويو، جهيڙي ۾ مارجي ويلن جو انگ 2 ٿي ويو، رتوديرو ڀرسان لاشاري ٿاڻي جي حد واري ڳوٺ چنگل ۾ 11 ڌينهن اڳ ويسر برادري جي ٻن ڌرين وچ ۾ پراڻي تڪرار تان ٿيل جهيڙي ۾ فائرنگ دوران گوليون لڳڻ سبب زخمي ٿيل 25 ورهين جو نوجوان مجاهد پٽ عبدالعزيز ويسر علاج دوران لاڙڪاڻو جي اسپتال ۾ زخمن جي سٽ نہ سهندي فوت ٿي ويو، نوجوان جو لاش پوسٽ مارٽم لاء تعلقہ اسپتال رتوديرو آندو ويو، جتان ضروري ڪارروائي بعد لاش وارثن حوالي ڪيو ويو، ان حوالي سان فوتي جي امڙ زوليخان خاتون چيو تہ معمولي ڳالھ تان شبير، پرويز، صدام ويسر ۽ انهن جي ٻين ساٿين اسان جي گهر تي حملو ڪري فائرنگ ڪئي جنهن ۾ گوليون لڳڻ سبب منهنجا ٻہ پٽ مجاهد ۽ نصر الله زخمي ٿي پيا هئا، جنهن ۾ مجاهد کي ڳڻتي جوڳي حالت ۾ علاج لاءِ لاڙڪاڻو جي اسپتال ۾ داخل ڪرايو هيوسين، جتي هو اڄ فوت ٿي ويو، هن چيو تہ اسان جي مخالفن اسان جي گهرن تي بہ قبضو ڪري ڇڏيو آهي ۽ اسان جي گهر جو سڄو سامان بہ پوليس کڻي وئي آھي، هن ڊي آءِ جي ٖ۽ ايس ايس پي لاڙڪاڻو کي اپيل ڪندي چيو تہ واقعي جي جاچ ڪري اسان سان انصاف ڪيو وڃي، ياد رهي تہ 11 ڏينھن اڳ ويسر برادري جي ٻن ڌرين وچ ۾ ٿيل جهيڙي سبب هڪ ڌر جو 70 ورهين جو پيرسن بخشل ويسر قتل ٿي ويو هيو جڏهن ته 5 ڄڻا زخمي ٿي پيا هئا.