ميرپور بٺورو پوليس پاران اشتھاري ڏوھاري کي زخمي حالت ۾ گرفتار ڪرڻ جي دعويٰ

ميرپور بٺورو پوليس پاران اشتھاري ڏوھاري کي زخمي حالت ۾ گرفتار ڪرڻ جي دعويٰ

سجاول (گلشيرميربحر) ضلعي سجاول جي پوليس جون ڏوھارين خلاف ڪاروايون جاري، گذريل رات دير سان ميرپور بٺورو پوليس جو ڏوھ جي ارادي سان روڊ تي بيٺل ڏوھارين سان مقابلو، ھڪ اشتھاري ڏوھاري زخمي حالت ۾ گرفتار، ٻہ ڏوھاري فرار، اسلحو برآمد.سجاول پوليس جي ترجمان غلام قادر گوپانگ مطابق ايس ايس پي سجاول ڊاڪٽر عبدالخالق پيرزادو جي سخت ھدايتن تي سجاول پوليس جون ڏوھارين خلاف ڪاروايون جاري آھن، ان سلسلي ۾ ايس ايڇ او ميرپور بٺورو مير محمد گاڏھي کي گذريل رات اطلاع مليو تہ ٽي ڏوھاري ميرپور بٺورو لڳ جاڙا واھ ۽ ستاھ واھ بخاري درگاھ جي ويجھو لنڪ روڊ تي رڪاوٽون رکي ڏوھ جي ارادي سان بيٺل آھن جنھن تي ايس ايڇ او ميرپور بٺورو انچارج جاتي چوڪ ۽ پوليس پارٽي سان گڏ مليل اطلاع واري جاء تي پھتو تہ ڏوھارين پوليس کي ڏسي فائرنگ شروع ڪري ڇڏي جنھن تي پوليس بہ جوابي فائرنگ ڪئي ۽ ٻنھي طرفن فائرنگ جو سلسلو ھلندو رھيو ان نتيجي ۾ ھڪ ڏوھاري کي زخمي حالت ۾ پوليس گرفتار ڪري ورتو جڏھن تہ ٻيا ٻہ ڏوھاري فرار ٿيڻ ۾ ڪامياب ٿي ويا. پوليس موجب جانچ بعد گرفتار ٿيل ڏوھاري جي سڃاڻپ سجاول ضلعي جي اشتھاري ڏوھاري محمد صديق گھجڙيو ملاح طور ٿي جيڪو چورين، ڌارن ۽ ڦرون ۾ ملوث آھي ۽ ھن خلاف ضلعي جي مختلف ٿاڻن تي ڪيترائي ڪيس داخل آھن. پوليس ترجمان موجب مقابلي واري جاءِ تان ھڪ ٽي ٽي 30 بور پسٽل، ھڪ ڦر ڪيل موٽر سائيڪل، 12 عدد ڪلاشنڪوف جا خالي خول ۽ 6 عدد پسٽل جا خالي خول برآمد ٿيا آھن. زخمي حالت ۾ گرفتار ڪيل ڏوھاري کي ميڊيڪل چيڪ اپ لاء ميرپور بٺورو اسپتال منتقل ڪيو ويو آھي. جڏھن تہ سندس خلاف وڌيڪ جاري آھي، جڏھن تہ گرفتار ۽ فرار ٿيل ٻين ڏوھارين خلاف ٻہ جداد جدا ڪيس داخل ڪيا ويا آھن. ٻئي طرف ايس ايس پي سجاول ڊاڪٽر عبدالخالق پيرزادو ايس ايڇ او ميرپور بٺورو مير محمد گاڏھي ۽ ان جي ٽيم کي ڏوھ جي ڪوشش ناڪام بنائڻ ۽ اشتھاري ڏوھاري کي گرفتار ڪرڻ تي شاباسي ڏني ۽ تعريفي سند CCIII سرٽيفڪيٽ ڏيڻ جو حڪم ڏنو آھي.